कोरोनाका बालबच्चा अब हाँसेरै मर्ने भए !

असोज ३, २०७७ शनिबार ८:३५:५९ | मिलन तिमिल्सिना

कोरोनालाई रोक्न, छेक्न र खेद्न के के मात्र गरिएन ? ६÷६ महिना घरभित्र लुकियो । कहिले लकडाउन, कहिले सटडाउन, कहिले निषेधाज्ञा, कहिले कर्फ्यु, कहिले सिल, कहिले के नाम दिएर कोरोनालाई तर्साउन खोजियो ।

बेसारपानी, गुर्जो, हर्रो, बर्रो, तितेपानी देखाइयो । कहिले सेना तैनाथ गरियो, कहिले प्रहरी ! र, तिनले नसकेका बेला टोले गुण्डा पनि तैनाथ गरियो । कहिले सडक र बजारमा चौबीसै घण्टा कोरोनालाई मात्र हिँड्न दिइयो । कहिले मान्छे र कोरोना हिँड्ने तालिका बनाइयो । तै पनि केही जोर चलेन । कोरोनाले छोड्नै मानेन ।

लुकेर र आलोपालो गरेर पनि कोरोना नतर्सिएपछि सरकारले नयाँ रणनीति ल्याएको छ–अब कोरोनासँग लुक्ने होइन, भिड्ने ।

कोरोनासँग भिड्न एकैपटक धेरैखाले अस्त्र प्रयोगमा ल्याइएका छन् । यहीबेला सडक बजार खुलेको छ । लामो दूरीका गाडी चल्न थालेका छन् । आकाशमा जहाज उड्दैछन् । आफ्नै रेल देश भित्रिएको । अरु कसैले गर्न नसक्ने काम गर्ने वामदेव गौतम राष्ट्रियसभामा पुग्नुभएको छ । बिजुली अड्डामा छँदा बढेको कुलमानको ख्याति बाहिरिएपछि आकासिएको छ । मलमास यहीबेला परेको छ, दशै एक महिना पछि सरेको छ । यी सबै कोरोनाविरुद्ध प्रयोग भएका अस्त्र हुन् ।

सरकारको नयाँ रणनीतिअनुसार कोरोना आकाश, पाताल, सडक, बजार, घर, चौर, मैदान जहाँ पुगेको भए पनि अब नबच्ने भएको छ ।

जहाँ जस्तोसुकै अवस्थामा भए पनि कोरोना मान्छेको फेला पर्ने भएको छ । नेपालीसँग हायलकायल भएर भाग्ने अवस्थामा पुगेको छ ।

६ महिनासम्म रोकिएका सबैखाले गाडी अब चल्न थालेका छन् । छोटो दूरीमा हिँड्ने कोरोनालाई छोटो दूरीमा चल्ने गाडीले कुल्चेर मार्नेछ । लामो दूरीमा यात्रा गर्ने कोरोनालाई लामो दूरीमा चल्ने गाडीले पेल्नेछ । जोर नम्बर भएको कोरोनालाई जोर नम्बरको दिन जोर नम्बरको गाडीले र बिजोर नम्बर भएको कोरोनालाई बिजोर नम्बरको दिन बिजोर नम्बरको गाडीले ठक्कर दिनेछ ।

कोरोना आकाशमा पनि हुन सक्छ । अब आकाशमा भएको कोरोना पनि बाँच्न पाउँदैन । आन्तरिक र बाह्य उडानले उडेको कोरोनालाई जमिनमा खसाउनेछ । गाडी र जहाज मात्रै होइन, अब त रेल पनि गुड्ने भएको छ । नेपालको आफ्नै रेल आइपुग्यो । गाडीले नसकेका कोरोनालाई रेलले ठक्कर दिनेछ । कोरोना ठाउँको ठाउँ ठहरै हुनेछ ।

गाडी, रेल र जहाजको ठक्करबाट समेत नमासिएका कोरोनालाई नेपालीले हिँडेरै, दौडेरै, डुलेरै, घुमेरै कुल्चेर मार्नेछन् । अब दिन र बार हेरेर होइन, फुर्सद हुनेबित्तिकै बजार जान पाइने भएको छ । केही काम नभए पनि बजार डुल्ने र घुम्ने अवसर आएको छ । बाटोघाटो, छेउकुना, झारबुट्यान, सरसामानतिर अल्झिएर बसेका भाइरस पनि अब मर्ने भएको छ ।

केही दिनअघिसम्म दशैँ मान्न पर्दैन कि भन्ने थियो । अब सरकारले दशैँ मान्न दिने भएको छ । एकसुको नभए पनि, काम र कमाइ गुमे पनि नेपालीले दशैँमा मासु खान छोड्दैनन् । दशैँमा मासु खाएर बलियो भएपछि सबै नेपाली देखेर कोरोना आफैं पनि भाग्छ ।

अर्को महत्वपूर्ण कुरा अब मलमास लाग्यो । मलमासमा धेरै कुरा बार्नुपर्छ । मान्छेलाई लाग्ने नियम कोरोना भाइरसलाई पनि लाग्छ । अब कोरोनाले पनि मलमास बार्छ । मलमासभरी कोरोनाले केही गर्न पाउँदैन । यसअघिजस्तो कोरोना निस्फक्री हिँड्न पाउँदैन ।

मलमास सकिएपछि दशैँ सुरु हुन्छ । दशैँ त कोरोनाले पनि त मान्नुपर्ला । मानेन भने पनि दशैँमा मासु खाएर बलियो भएका नेपालीका अघिल्तिर कोरोनाको केही लाग्दैन ।

गफ दिन झापाका केपी ओलीलाई आजसम्म कसैले रोक्न सकेको छैन । अब त प्युठानी वामदेब समेत थपिएका छन् । पूर्व र पश्चिमका रमाईला गफ सुनेर कोरोनाका बालबच्चा त अब हाँसेरै पनि मर्न थाल्छन् ।

कोरोनालाई निमिट्यान्न पार्न कोरोनाविरुद्धका केही बुँदा थपेर संविधान संशोधन पनि गर्न सकिन्छ । संविधान दिवसकै छेको पारेर संविधानमा संशोधन गर्न सकियो भने कोरोना भगाउन भैरहेको बलले सार्थकता पाउँछ । संविधान संशोधन गरेर कोरोना लाग्न नदिने बुँदा थप्नुपर्छ । संविधानमा लेखिएका कुरा पूरा गर्नुपर्ने हैन, संवैधानिक व्यवस्था यस्तो छ भनेर गफ दिनका लागि हो ।

सबैभन्दा ठूलो कुरा वामदेव गौतमले बल्लबल्ल ठाउँ पाउनुभयो । राष्ट्रियसभामा पुग्नुभयो । अलि दिनपछि मन्त्री पनि बन्नुहोला । कस्ता कस्ता मै हुँ भन्न त वामदेव देखेर डराउँछन्, कोरोना जाबो नडराइ सुख !

वास्तवमा भन्ने हो भने अहिलेसम्म कोरोनाले दुःख दिइरहनु, नेपालीले दुःख पाइरहनु, देशले मुहार फेर्न नसक्नुको एउटै कारण वामदेव गौतम ठाउँमा नपुगेर हो । प्रतिनिसभामा हारेकाले हो । मतदाताले हराएर के भो त ? पार्टीले अब ठाउँमा पुर्याएको छ । वामदेव देखेरै अब कोरोना भाग्नेछ ।

अन्तिम अपडेट: मंसिर ५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

मिलन तिमिल्सिना

दुई दशकदेखि रेडियो र अनलाइन पत्रकारितामा संलग्न मिलन तिमिल्सिना समसामयिक विषयमा विश्लेषण र व्यंग्यमा दखल राख्नुहुन्छ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्