'बलात्कारी संगठन' नामक फेसबुक पेज तथा ग्रुप चलाउने व्यक्ति पक्राउ

 असोज ३०, २०७७ शुक्रबार १९:३७:१९ | उज्यालो सहकर्मी
unn.prixa.net

काठमाण्डाै – सामाजिक सञ्जाल फेसबुकमा रेपर एसोसिएशन (बलात्कारी संगठन) नामक पेज तथा समूह बनाएर चलाउने एक युवकलाई प्रहरीले पक्राउ गरेको छ ।

प्युठानको झिम्रुक गाउँपालिका ७ घर भई नवलपुरको कावासोती नगरपालिका बस्ने १९ वर्षीय नवीन बस्नेतलाई नवलपरासी प्रहरीको सहयोगमा साइबर ब्युरोले शुक्रबार कावासोतीबाट पक्राउ गरेको हो । 

पक्राउ परेका युवकले अश्लिल, आपत्तिजनक सामग्री पोस्ट गर्ने, प्रतिक्रिया जनाउने लगायतका काम गर्दै आएको ब्युरोले जनाएको छ । 

युवकमाथि विद्युतीय कारोबार ऐन २०६३ को दफा ४७ को उपदफा १ बमोजिमको कसुर गरेको भन्दै जिल्ला अदालत काठमाण्डौबाट पक्राउ पुर्जी जारी भएको थियो । अहिले उनीमाथि अनुसन्धान भइरहेको ब्युरोले जनाएको छ ।  

अन्तिम अपडेट: कात्तिक ४, २०७७

तपाईको प्रतिक्रिया