यसरी जोगिइन् सुशिला दलालको फन्दाबाट

साउन २८, २०७५ सोमबार १६:३१:३३

रीना श्रेष्ठ/सिन्धुपाल्चोक

सिन्धुपाल्चोक – हैबुङकी सुशिलाको घर भूकम्पले भत्कियो । बनाउने पैसा भएन । रामेछापका राम नाम गरेका व्यक्तिसँग घर बनाउन पैसा माग्नुभयो । उसले दिएन ।

पैसा नदिएका व्यक्तिले आफूले विदेश पठाइदिने व्यक्ति चिनेको भन्दै जाने भए त्यो व्यक्तिसम्म पुर्याइदिने बताए । त्यो कुरा उनले सुशिलासँगै उहाँका अरु दुई दिदी बहिनीलाई पनि भने ।

सुशिलाले विदेश जाने सोच्नुभएको थिएन । बहिनीहरु पनि सुशिला जस्तै थिए । पासपोर्ट बनाउने त कुरै थिएन । तिनै व्यक्तिले विदेश पठाइदिने कुरा गरेपछि सुशिला जिल्ला प्रशासन कार्यालय पुग्नुभयो पासपोर्ट बनाउन ।

पासपोर्ट बनाउनु अघि सूचना केन्द्रमा जानैपर्ने बाध्यताले सुशिलालाई विदेशका बारेमा त जानकारी लिन सघायो नै । विदेश जाँदा पर्न सक्ने जोखिमका बारेमा पनि सचेत गरायो ।

सुशिलाले सूचना केन्द्रबाट ३५ वर्ष नाघेका व्यक्तिले सीपको काममा जान नपाउने मात्रै होइन, सरकारले खाडीका देशमा घरेलु काममा जान रोक लगाएको कुरा पनि थाहा पाउनुभयो ।

परामर्शपछि जिल्ला प्रशासनको सिफारिस लिएर सुशिला र उहाँका दुई बहिनीले काठमाडौं आएर पासपोर्ट लिनुभयो । घर बनाउने पैसा माग्दा नदिएको त्यही व्यक्तिले पासपोर्ट बनाउन भने सुशिलालाई पैसा दियो । पासपोर्ट बने लगत्तै सुशिलाका दुईजना बहिनीको पासपोर्ट उसैले लियो । तर सुशिलाले उसलाई पासपोर्ट दिनुभएन ।

विदेश जानु अघि आफू जाने देश, त्यहाँ गर्नुपर्ने कामका बारेमा जानकारी लिनुपर्छ भन्ने कुरा थाहा पाएकी सुशिलाले त्यो व्यक्तिलाई सोध्नुभयो, भाइ हामीलाई कुन म्यापावरबाट कुन देशमा पठाउन लागेको हो? म्यानपावर देखाउ त ? त्यो व्यक्तिसँग सुशिलालाई दिने उत्तर थिएन ।

किनकी उसले भारतको बाटो हुँदै पठाउन लागेको थियो । जुन कुरा सुशिलाले आफू काठमाडौंको बाहेक अर्को एयरपोर्टबाट विदेश नउड्ने अडान लिएपछि थाहा भयो । उहाँको जसरी उहाँका बहिनीहरुले अडान लिन सकेनन् ।

उनीहरुलाई त्यही व्यक्तिले विदेश पठायो अवैधानिक रुपमा । उनीहरु कहाँ पुगे अनि अवस्था कस्तो छ भन्ने न सुशिलालाई थाहा छ न उनीहरुका परिवारलाई । सुशिलालाई विदेश जान नपाएको कुनै दुखेसो छैन । उहाँ खुशी हुनुुहन्छ दलालको फन्दाबाट जोगिन पाएकोमा ।

घरमा समस्या नभए जोखिम लिन्न थिएँ

उहाँलाई विदेश जाने रहर थिएन । तर चार जनाको परिवार चलाउन सुशिलालाई कमाउने माध्यम चाहिएको छ । दुई छोराछोरीमध्ये छोरीको बिहे भइसक्यो, तर १२ कक्षामा पढ्दै गरेको छोरोलाई उसले चाहेसम्म पढाउने चाहना छ सुशिलाको ।

तर घर चलाउने आर्थिक जोहो गर्न गाह्रो पर्ने सुशिलालाई त्यही कुराले विदेश जाने सोचमा पुर्‍यायो । ‘घर चलाउने खर्च जुटाउन सक्ने भए जोखिम हुन्छ भन्ने थाहा हुँदाहुँदै किन पासपोर्ट बनाउँथे र’ सुशिलाले भन्नुभयो ।

विदेश जान पासपोर्ट बनाइसक्दा पनि उहाँले घर सल्लाह गर्नुभएको थिएन । पछि परिवारलाई पासपोर्ट बनाएकोसँगै आफू विदेश नजाने भएको कुरा सुनाउनुभयो सुशिलाले । अब त उहाँले सरकारले महिलालाई जान खुल्ला नगरेसम्म नजाने निधो गर्नुभएको छ ।

अन्तिम अपडेट: पुस ५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्