‘आकाश–पाताल खाेजेर यति जना चिनी उद्याेगी समातियो भन्नुपर्‍याे’

पुष २, २०७७ बिहीबार १८:१९:३३ | उज्यालो सहकर्मी

काठमाण्डाै – उखु किसानको भुक्तानी नदिने उद्योगीहरूलाई कडा कारबाही गरी पैसा असुल गर्नुपर्ने सांसदहरूले बताएका छन् ।

सङ्घीय संसद्को प्रतिनिधि सभाअन्तर्गतकाे उद्योग तथा वाणिज्य र श्रम तथा उपभोक्ता हित समितिको बिहीबारको बैठकमा बोल्दै सांसदहरूले उद्योगीलाई कारबाही गरी उखु किसानको बक्यौता रकम तिराउनुपर्ने बताएका हुन् ।

बैठकमा बोल्दै नेपाली कांग्रेसका सांसद प्रकाश रसाइलीले उखु उद्योगबाट आम्दानी गरेको रकम अन्य व्यवसायमा लगानी गर्ने तर किसानलाई पैसा नदिने उद्योगीलाई ब्याजसहितको रकम तिराउनुपर्ने बताउनुभयो । उहाँले भन्नुभयो, ‘राज्यलाई विभिन्न बहाना गरेर पैसा नतिर्ने र त्यो पैसाले अरू व्यवसाय गर्ने भएकाले उद्योगीले पैसा नतिरेका हुन् । उखु किसानलाई ब्याज तिर्नुपर्छ । किसानले घर जग्गादेखि बिउ बिजनसम्म ब्याजमा लिएर किनिरहेका छन् । उखु किसान चाहिँ माइतीघरमा आएर रोइ रहनुपर्ने ? उद्योगीले किसानलाई ब्याज तिर्नुपर्छ ।’

बैठकमा कांग्रेस सांसद भीमसेनदास प्रधानले उद्योगीको सम्पत्तिबाट भए पनि किसानलाई भुक्तानी दिलाउनुपर्ने बताउनुभयो ।

जनता समाजवादी पार्टी (जसपा) नेपालकी सांसद अमृतादेवी अग्रहरीले एक वर्ष पहिला पनि उखु किसानको आन्दोलन भएको स्मरण गर्दै त्यति बेला सरकारलाई निर्देशन दिएको भए पनि सरकारले मौनता साँधेको आरोप लगाउनुभयो । राज्यले उखु किसानको समस्या र चिनी मिललाई प्राथमिकताका साथ हेर्नुपर्ने पनि उहाँले बताउनुभयो । उहाँले भन्नुभयो, ‘उखु किसानलाई राज्यले संरक्षण दिएन भने चिनी मिल बचाउन सकिँदैन । पहिलो प्राथमिकता उखु किसानलाई दिनुपर्छ ।’

नेपाल कम्युनिस्ट पार्टी (नेकपा) का सांसद कृष्णकुमार श्रेष्ठले उखु किसानमाथि अत्याचार भएको भन्दै उद्योगीहरूलाई केही घण्टा समय दिएर पक्राउ गर्नुपर्ने बताउनुभयो । उहाँले भन्नुभयो, ‘गोदाममा चिनी छैन रे, चिनी त बेचिसकियो होला त्यो पैसा खोइ ? अत्याचार भयो किसानलाई, अब दिनको कुरो होइन, घण्टाभित्रमा पक्राउ गर्नुपर्‍याे । साँवासम्म दिलाउँ । आकाश–पत्ताल खोजेर यति जना समातियो भन्नुपर्‍याे ।’

सांसदहरूले उखु किसानको समस्या दीर्घकालमा नआउने गरी समाधान गर्नसमेत माग गरेका छन् । उनीहरूले अहिलेको समस्या तत्काल समाधान गरी किसानलाई घर फर्किने वातावरण बनाउनुपर्नेमा जोड दिएका छन् ।

अन्तिम अपडेट: मंसिर ६, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्