प्रिमियर लिगको कमजोर क्लब मानिएको ब्राइटन एण्ड होव अल्वियनसँग ३–२ ले पराजित भएपछि म्यानचेस्टर युनाइटेडका समर्थक प्रशिक्षक जोसे मोरिन्होप्रति आक्रोशित छन् ।

प्रिमियर लिगको दोस्रो खेलमा भोगेको हारका कारण मोरिन्होको व्यापक आलोचना हुँदै आएको छ । उनलाई बर्खास्त गरेर नयाँ प्रशिक्षक भित्र्याउनु पर्ने स्वरहरु आउन थालेका छन् । तर क्लबको बोर्डले भने मोरिन्होको विकल्प नखोजिने स्पष्ट पारेको छ ।

मोरिन्होलाई बर्खास्त गरेर हाल कुनै क्लबमा आवद्ध नरहेका रियल मड्रिडका पूर्व प्रशिक्षक जिनेदिन जिदानलाई अनुबन्ध गर्नका लागि सुझाव आइरहेका बेला क्लबले, ‘जिदानको बारेमा किन छलफल गर्नुपर्‍याे ? जब कि यहाँ प्रशिक्षकको पद खाली नै छैन’, भनेको छ ।

क्लबमा केही खेलाडी थप्नु पर्ने भनेर मोरिन्होले बोर्डसामु राखेको प्रस्ताव अस्वीकृत हुँदा मोरिन्हो पनि निराश छन् । उनी सेन्टर डिफेन्समा एन्थोनी मार्सियलको विकल्पका रुपमा खेलाडी अनुबन्ध गर्न चाहन्थे ।

अनुबन्ध गर्ने कुनै बाटो खुल्ला नभएपछि मोरिन्होले क्लबका लागि ‘कठिन सिजन’ हुने प्रतिक्रिया दिएका थिए ।