दार्चुला – दार्चुलाको व्यास गाउँपालिका २ मालघाटमा महाकाली नदी तर्ने क्रममा एक जना बेपत्ता भएका छन् । सदरमुकाम खलङ्गा आउने क्रममा मालका ३० वर्षका जयसिंह धामी बेपत्ता भएका हुन् । 

महाकाली तर्ने क्रममा भारतीय सीमा सुरक्षा बल (एसएसबी) ले देखेपछि तुइन काटिदिएको स्थानीय विक्रमसिंह धामीले बताउनुभएको छ । पाँच/छ जना स्थानीय बासिन्दा सामान लिन भारतको बाटो हुँदै आइरहेको र जयसिंह तुइन तर्ने बेला एक्कासी एसएसबीले तुइन काटिदिएको उहाँको दाबी छ । 

नेपालतर्फ मालघाट र भारततर्फ जयकोट गस्कोमा स्थानीय बासिन्दाले वारपार गर्न तुइन राखेको र आउजाउ गर्ने गरेको तर एसएसबीले तुइन काटेर धामी बेपत्ता भएकोबारे यसै भन्न नसकिने जिल्ला प्रहरी कार्यालय दार्चुलाले जनाएको छ । 

तुइनबाट खसेर बेपत्ता भएका धामीको खोजी गर्न र घटनाबारे बुझ्न टोली खटिएको जिल्ला प्रहरी कार्यालय दार्चुलाका प्रहरी निरीक्षक (इन्सपेक्टर) एवम् सूचना अधिकारी नरेन्द्र चन्दले जानकारी दिनुभयो । घटनापछि स्थानीय बासिन्दाले जिल्ला प्रशासन कार्यालयमा पनि जानकारी गराएका छन् । 

नेपालतर्फ सडक नहुँदा व्यास क्षेत्रका बासिन्दाले सदरमुकाम खलङ्गा आउन भारतको बाटो हुँदै महाकाली नदीमा तुइन तरेर आउनुपर्ने बाध्यता छ । पुल बनाउन २०७६ सालमा ठेक्का लागेको भए पनि अहिलेसम्म बन्न सकेको छैन ।