श्रम नवीकरण गर्न टोकन

भिड घट्यो, अनियमितता घटेन : सेवाग्राही

भदौ १५, २०७५ शुक्रबार १२:२२:४८ | उमाकान्त पाण्डे

काठमाडौं – गएको मंगलबार वैदेशिक रोजगार विभाग काठमाडौं कार्यालय श्रमग्राम ताहाचलमा सेवाग्राहीको भिड थियो । आइतबार जनै पूर्णिमा र सोमबार गाईजात्राको बिदा भएकाले पुनः श्रम स्वीकृति लिने अथवा श्रम नवीकरण गर्ने, व्यक्तिगत र संस्थागत हिसावले श्रम लिनेहरुका कारण भिड बढेको हो ।

घर बिदामा आएका र विदेशिनु अघि श्रम गर्न आउने सेवाग्राहीका कारण काठमाडौं कार्यालय सधैं अस्तव्यस्त र भिडभाड हुने अड्डा हो । सेवाग्राहीलाई समयमै सेवाप्रदान गर्न र भिडलाई व्यवस्थापन गर्न नसक्दा हुने अनियमितताका कारण कार्यालय यसअघि सधैं विवादमा पर्दै आएको छ ।

अब भने कार्यालयलाई सुधार गर्न लागिएको छ । भिडभाड व्यवस्थापन गर्न र स्तरीय सेवा दिन कार्यालयले टोकन प्रणाली लागु गरेको छ । गएको हप्ताबाट लागु गरिएको टोकन सिस्टम पहिलो पटक श्रम नविकरण अथवा पुनः श्रमस्वीकृति दिने शाखामा प्रयोग गरिएको छ ।

बीमा र कल्याणकारी कोषमा रकम बुझाएपछि अनलाइन फारम भरेर सेवाग्राहीले सुरुमै टोकन लिनुपर्छ । टोकनमा उल्लेख भएको क्रम संख्याका आधारमा पालो कुर्नुपर्छ । आफ्नो नम्बर डिजिटल बोर्डमा डिस्प्ले हुन्छ । सँगै सुनाइन्छ पनि ।

त्यसै अनुसार आफूले कुन देशका लागि श्रम नविकरण गर्न लागेको हो त्यही देशका लागि छुट्याइएको शाखाको झ्यालमा गएर कागजपत्र बुझाउनु पर्छ । कागजपत्र बुझाएपछि आँखा स्क्यान गरिन्छ । त्यति गरेपछि आवेदन प्रक्रिया पूरा हुन्छ ।

आवेदन परीक्षण गरेर कम्प्युटरमा अभिलेख राखिन्छ । हरेक १५ जनाका हिसाबले श्रम स्टिकर एक पेजमा प्रिन्ट हुन्छ । र त्यो स्टिकर पासपोर्टमा टाँसेर अधिकृतले हस्ताक्षर गरेपछि १५ देखी २० मिनेटको समयमा नाम बोलाएर पासपोर्ट फिर्ता दिने व्यवस्था गरिएको छ ।

अनियमितता बन्द हुनुपर्छ : सेवाग्राही

विवादित भइरहने काठमाडौं कार्यालयमा टोकन सिस्टम लागु भएसँगै अनियमितता पनि बन्द हुनुपर्ने सेवाग्राहीको भनाइ छ । टोकन नम्बर बाहेक आफन्त वा आर्थिक लेनदेनको प्रलोभनमा भित्र कागजपत्र पुर्‍याएर काम गर्ने सम्भावना अझै पनि बाँकी भएको उनीहरुले बताएका हुन् ।

त्यसको निगरानी गर्दै अनियमितता रोक्नु पर्ने सेवाग्राहीले बताएका हुन । आफू भन्दा पछि रोलक्रम हुनेको काम आफ्नो भन्दा पहिले नै भएकोले भित्री सेटिङ भएको हो कि भन्ने लागेको सुनसरीको इटहरीका भुवनराज घिमिरेले बताउनुभयो ।

मंगलबार मात्रै दुई हजार भन्दा धेरै सेवाग्राही भएको र कागजपत्र तलमाथि भएको हुनसक्ने विभागले जनाएको छ । सबैतिर सिसीटिभी जडान गरेर निगरानीमा राखिएकाले गलत नहुने कार्यालयका प्रमुख भविश्वर पाण्डेले बताउनुभयो ।

थप सुधारका लागि प्रयासरत छौं : महानिर्देशक पाण्डे

टोकन सिस्टम लागु गरेसँगै भिड व्यवस्थापन गर्न र व्यवस्थित गर्न सहज भएपनि अझै चाहेजस्तो बनाउन नसकिएको कार्यालयका प्रमुख पाण्डेले बताउनुभयो ।

‘कार्यालय सुधारका लागि प्रयास सुरु गरेका छाैं । पहिले भन्दा धेरै परिवर्तन देख्न सक्नुहुन्छ,’ पाण्डेले भन्नुभयो । श्रम, रोजगार तथा सामाजिक सुरक्षा मन्त्रालयले कार्यालयमा सुधारको अपेक्षा सहित पाण्डेलाई तीन महिना अघि कार्यालय प्रमुखको रुपमा पठाएको हो ।

अन्तिम अपडेट: मंसिर ६, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।