काठमाण्डौ – भारतका केन्द्रीय मन्त्री नारायण राणेलाई प्रहरीले पक्राउ गरको छ । महाराष्ट्रका मुख्यमन्त्री उद्धव ठाकरेलाई अपशब्द बोलेको र धम्की दिएको विषयमा प्रहरीले राणेलाई पक्राउ गरेको बीबीसीले जनाएको छ ।   

आर्शीवाद यात्राका क्रममा रत्नागिरी पुगेका मन्त्री राणेलाई र्‍यालीबाटै पक्राउ गरिएको खबरमा उल्लेख छ । 

एक कार्यक्रममा महाराष्ट्रका मुख्यमन्त्री ठाकरेले भारतको स्वतन्त्र भएकोबारे गलत मिति उल्लेख गर्नुभएको थियो । यसै विषयमा केन्द्रीय मन्त्री राणेले आफूले ठाकरेलाई भेटेको भए थप्पड हान्ने अभिव्यक्ति दिनुभएको थियो । 

समाचार एजेन्सी पीटीआईका अनुसार सोमवार रायगढमा राणेले जन आशीर्वाद यात्राका क्रममा भनेका थिए, ‘मुख्यमन्त्रीलाई स्वतन्त्रता वर्षको बारेमा थाहा नहुनु लाजमर्दो कुरा हो । उनले भाषणका क्रममा पछि फर्किएर स्वतन्त्रता वर्षका बारेमा जान्नका लागि सोधे । यदि म त्यहाँ हुन्थेँ भने उनलाई जोडले थप्पड हान्थेँ ।’