काठमाण्डौ – गृह मन्त्री बालकृष्ण खाणले दार्चुलाका जयसिंह धामी बेपत्ता भएका तुइन प्रकरणको छानबिन प्रतिवेदन चाँडाे आउने बताउनुभएको छ । 

प्रतिनिधि सभाको राज्य व्यवस्था तथा सुशासन समितिको बैठकमा सदस्यहरूले उठाएको जिज्ञासाको जवाफ दिने क्रममा उहाँले घटनाको मन्त्रालयद्वारा गठित समितिले गम्भीर रुपमा छानबिन गरिरहेको बताउनुभयो ।

उहाँले केही सदस्य काम विशेषले बाहिर जाँदा प्रतिवेदन तयार हुन ढिलाइ भएको समेत जानकारी दिनुभयो । 

गृह मन्त्री खाणले विसं २०५० देखि अहिलेसम्म त्यस जिल्लामा तुइनबाट खसेर २६ जनाको निधन भएको पनि जानकारी गराउनुभयो । उहाँले ‘महाकाली नदीमाथिको तुइन हटाएर पुल निर्माणका लागि पनि निर्देशन भइसकेको समितिलाई जानकारी गराउनुभयो ।

‘नागरिकको ज्यान जोगाउनु राज्यको दायित्व हो, नागरिकको जीवन रक्षाका लागि सरकार हिजो पनि गम्भीर थियो, आज पनि छ र भोलि पनि हुनेछ’, उहाँले भन्नुभयो ।