काठमाडौं – एक सय रुपैयाँमै नर्सरीदेखि स्नातकोत्तरसम्म पढाउने समता शिक्षा अभियानका अभियन्ता उत्तम सञ्जेल वैवाहिक बन्धनमा बाँधिएका छन् । 

सञ्जेलले आफैले सञ्चालन गरेको समता अस्पतालमा हेल्थ असिस्टेन्टको रुपमा कार्यरत सुन्दरीजलकी कला अधिकारीसँग विवाह गरेका हुन् । 
काठमाण्डौंको गुहेश्वरी मन्दिर परिसरमा साधारण कार्यक्रम गरेर उनीहरु वैवाहिक बन्धनमा बाँधिएका हुन् ।  

उनीहरुको बिहेमा सहभागी जन्तीहरु पनि थोरै थिए भने बिहेमा जम्मा ३ सय रुपैयाँ मात्रै खर्च भएको सञ्जेलले बताउनुभयो । 

कलालाई दुलही बनाएर भित्र्याउन सिन्दुर, पोते र सयपत्री फूलको माला किन्दा ३ सय रुपैयाँ खर्च भएको थियो । विवाहमा बेहुला उत्तमले समता स्कुल भारत लेखिएको टिसर्ट र पाइन्टका साथै चप्पल लगाएका थिए भने बेहुली कलाले पनि कुर्ता सुरुवाल र चप्पल लगाएकी थिइन् । बेहुलीले लगाउने घुम्टो पनि उत्तमलाई आफन्तले नै उपहार दिएका थिए ।  

जन्तीको रुपमा चर्चित हस्तीहरु मदनकृष्ण श्रेष्ठ, हरिवंश आचार्य, उपेन्द्र महतो, गुणराज लुईंटेल, सुवास घिमिरे, प्रतीक प्रधान, मनोज गजुरेल, सीताराम कट्टेल लगायत रहनुभएको थियो । 

बिहेपछि महसञ्चारले भोजको आयोजना गरेको थियो । भोजमा सुगर फ्री लड्डु बाँडिएको थियो । तर निम्तालु हिँडेपछि भने सञ्जेलले जग्गेमै बसेर परम्परागत शैलीमा बिहे गरेको तस्विर पनि सार्वजनिक भएको छ । 

सञ्जेलले नेपालका ७७ जिल्लासहित छिमेकी देश भारत, श्रीलंका, बंगालदेशका करिब ६५ हजार गरिब बिद्यार्थीलाई सहज शिक्षा अभियान चलाइरहेका छन् ।

तस्बिर साैजन्य: गजुरीयल डट कम