अवैधानिक कामदारसँगै मलेसियाका रोजगारदाता पनि पक्राउ परे

भदौ १९, २०७५ मंगलबार १३:२२:१४ | उज्यालो सहकर्मी

मलेसिया – मलेसियामा ३० हजार भन्दा धेरै अवैधानिक विदेशी कामदार पक्राउ परेका छन् ।

मलेसियाली अध्यागमनका निर्देशक दातुक सेरी मुस्ताफर अलिका अनुसार गएको आठ महिना अर्थात जनवरी १ देखि सेम्टेम्बर ३ सम्ममा अवैधानिक रुपमा मलेसियामा रहेका विदेशी नागरिकलाई पक्राउ गरिएको हो ।

मलेसियालाई अवैधानिक कामदारमुक्त बनाउने भन्दै मुस्ताफर अलिले देशव्यापी रुपमा नै अभियान चलाएर अवैधानिक रुपमा रहेका कामदारलाई पक्राउ गर्न सुरु गरिएको बताएका छन् ।

‘अवैधानिक कामदारका कारण धेरै समस्या उत्पन्न भएका छन्, स्वास्थ्य र लागुऔषध लगायतका समस्या उत्पन्न भएका छन्, त्यसैले हामी अवैधानिक कामदारका हकमा भने पछि हट्न सक्दैनौं,’ निर्देशक मुस्ताफर अलिको भनाइलाई उद्धृत गर्दै द स्टारले लेखेको छ ।

पटक पटक अवैधानिक कामदारलाई स्वदेश फर्किन मौका दिएपनि मलेसियामै लुकेर बसिरहेको पाइएको भन्दै निर्देशक अलिले धरपडक तिव्र बनाएको बताएका छन् ।

रोजगारदाता पनि पक्राउ

अवैधानिक विदेशी नागरिकलाई काममा लगाउने एक हजार जना रोजगारदातालाई पनि पक्राउ गरिएको छ । अवैधानिक कामदारलाई काममा लगाएको पाइएमा रोजगारदातालाई पनि कारवाही गर्ने मलेसियाले जनाएको छ ।

एकातिर अवैधानिक विदेशी कामदारलाई काममा लगाउँदा प्रशासनको निशानामा परिने डर रोजगारदातालाई छ भने अर्कातिर कामदार नहुँदा काममा असर पर्ने हो कि भन्ने चिन्ता छ ।

रोजगारदाता र सरोकारवालाले धरपकडप्रति चिन्ता व्यक्त गर्दै उपयुक्त विकल्प ल्याउन आग्रह गरेका छन् । तर मलेसियाको सरकारले भने थप कडाइ गर्ने बताउँदै आएको छ ।

अवैधानिक आप्रवासी कामदारलाई स्वदेश फर्कनका लागि सञ्चालन भएको ‘थ्री प्लस वान सरेन्डर प्रोग्राम’ नाम दिइएको आममाफी कार्यक्रम सकिएपछि मलेसियाले अवैधानिक कामदारविरुद्ध धरपकड गर्ने भएको हो । यसबाट अवैधानिक रुपमा बसिरहेका नेपाली कामदार प्रभावित हुनेछन् ।

गएको फेबु्रवरी १५ अर्थात फागुन ३ गतेदेखि मलेसियाले अवैधानिक रुपमा रहेका विदेशी कामदारलाई स्वदेश फर्किनका लागि ‘थ्री प्लस वान सरेन्डर प्रोग्राम’ सञ्चालन गरेको थियो । यो अवधि गएको बिहीबार सकिएको छ ।

मलेसियाले यसअघि पनि अवैधानिक रुपमा रहेका विदेशी कामदारलाई वैधानिक प्रक्रियामा दर्ता भई काम गर्न पाउने अवसरसहितको ‘रिहाइरिङ’ कार्यक्रम सञ्चालन गरेको थियो ।

तर झन्झटिलो प्रक्रियाका कारण धेरै विदेशी कामदार वैधानिक हुनबाट वञ्चित भएका छन् । यसरी वैधानिक हुने कार्यक्रम पनि गएको जुन महिनामै सकिएको छ । मलेसियाले अवैधानिक कामदारलाई वैधानिकता र आममाफी कार्यक्रम पटकपटक सञ्चालन गरिसकेको छ ।

तर यो समयमा स्वदेश नफर्किएका विदेशी कामदारलाई मलेसियाले पक्रने जनाएको छ । पछिल्लो समय दिएको आममाफीको उपयोग गरी १२ हजार ८४१ जना नेपाली स्वदेश फर्किएका मलेसियामा रहेको नेपाली दूतावासले जनाएको छ ।

मलेसियामा झण्डै ५ लाख नेपाली कार्यरत छन् । तीमध्ये कति नेपाली अवैधानिक रुपमा काम गरिरहेका छन भन्ने तथ्याङ्क छैन ।

अन्तिम अपडेट: पुस १६, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्