रामपुरमा खुल्यो फनपार्कः आन्तरिक पर्यटकको भिड

असोज ३१, २०७८ आइतबार २०:२७:४ | रासस

पाल्पा – रामपुरमै पहिलो पटक खुलेको ‘चिल्ड्रेन फनपार्क’ मा यतिखेर सबैको आकर्षण बढेको छ । बालबालिकालाई लक्षित गरी भर्खरैमात्र रामपुर नगरपालिका–५ बेझाड खेतमा सुरु गरिएको फनपार्क अहिले पर्यटकको गन्तव्यस्थल बन्न थालेको छ ।

विशेषगरी यहाँ साँझपख आन्तरिक पर्यटकको भिड लाग्ने गरेकाे छ । दिनभरको कार्यालयको थकान मेट्ने र बालबालिका भुलाउने माध्यम बनेको छ, फनपार्क । विद्यालय बिदाको समय र दशैँ पर्व भएकाले पनि अहिले यहाँ बालबालिकाको भिड लागेको छ । पार्कभित्र विभिन्न प्रकारका पिङ, चिप्लेटी, जम्पिङलगायत एक दर्जनभन्दा बढी मनोरञ्जनात्मक खेलका सामग्री उपलब्ध छन् । खेलकुदका लागि प्रति व्यक्ति ५० र अवलोकनका निम्ति २० रुपैयाँ प्रवेश शुल्क तोकिएको छ ।

स्थानीयवासी गोविन्द पाण्डे र शोभा पाण्डेले यहाँको पर्यटन विकास र बालबालिकालाई मनोरञ्जन प्रदान गर्ने उद्देश्यले झन्डै ४० लाख रुपैयाँकाे लगानीमा याे फनपार्क सञ्चालनमा ल्याउनुभएको छ । एक महिनाअघि देखि सुरु भएको पार्कमा दैनिक दुई सयदेखि पाँच सयसम्म बालबालिका आउने गरेका छन् । रामपुरमा जनघनत्व बढ्दै गएको अवस्थामा पर्यटन विकास गर्न र यहाँको आवश्यकतालाई मध्यनजर गर्दै बालबालिकालाई लक्षित गरी फनपार्क सञ्चालनमा ल्याएको सञ्चालक गोविन्द पाण्डेले बताउनुभयो । ‘बालबालिकालाई बिदाको समय घुम्ने र खेल खेल्ने ठाउँ नहुँदा उनीहरूलाई दृष्टिगत गर्दै कमसेकम विभिन्न मनोरञ्जन दिन सकियो भने मानसिक विकास हुनेछ भन्ने मनसायले पार्क सञ्चालनमा ल्याइएको छ’, उहाँले भन्नुभयो ।

अहिले सुरुवाती चरणमा बालबालिकालाई लक्षित गरी विभिन्न खेलजन्य मनोरञ्जनका सामग्री प्रयोगमा ल्याइएको छ भने अब युवायुवतीलाई पनि मनोरञ्जन प्रदान गर्ने खालका सामग्रीको बन्दोबस्त गर्ने उहाँको भनाइ छ । एघार वर्षसम्म बहराइनमा बस्नुभएका पाण्डेले विदेशको अनुभव र यहाँको प्रचुर सम्भावना देखेर पार्कको अवधारणा ल्याउनुभएको हो । बालबालिका मात्रै नभएर सबै उमेर समूहका व्यक्ति अवलोकनका निम्ति यहाँ आउने गरेको सञ्चालक शोभा पाण्डेले बताउनुभयो । दश वर्षसम्मका लागि चार रोपनी जग्गा भाडामा लिएर पार्कको पूर्वाधार तयार पारी सञ्चालनमा ल्याइएको छ । अहिलेलाई एक वर्षको भाडा एक लाख २५ हजार रुपैयाँ छ ।

विद्यालय छुट्टीको समय बेला–बेलामा पार्कमा आएर खेल खेल्दा धेरै रमाइलो लागेको विधान सिग्देलले अनुभव सुनाउनुभयो । रामपुरमा पहिलो पटक बालबालिकालाई लक्षित गरी सञ्चालन गरिएको फनपार्कले बिदाको समय बच्चाबच्ची भुलाउने माध्यम बनेको स्थानीयवासी इन्द्रराज सिग्देलले बताउनुभयो । ‘विद्यालय बिदाको बेला बच्चाबच्चीले घुम्न जान मन गर्ने, नजिक घुमाउने खालको मनोरञ्जनको ठाउँ नहुँदा उनीहरूको रहर पूरा गर्न सकिएको थिएन, अहिले बच्चाबच्चीलाई लक्षित गरी विभिन्न मनोरञ्जन प्रदान गर्न पार्कमा ल्याउन पाइएको छ’, उहाँले भन्नुभयो ।

विशेषगरी विद्यालय बिदाको समय बालबालिकाले अन्यन्त्र घुम्न जान मन गर्छन् । मनोरञ्जनकै लागि उनीहरूले भनेको समयमा बाहिर लिएर जान कहिलेकाहीँ अभिभावकलाई समय मिल्दैन भने कतिलाई अन्यत्र लैजान आर्थिक समस्या हुन्छ । यस कारण पनि यहाँ बालबालिकालाई मनोरञ्जन दिन सञ्चालन गरिएको पार्कले रामपुरको पर्यटन विकासमा ठूलो योगदान दिने रामपुर नगरपालिका–५ का सदस्य विष्णुप्रसाद बस्यालले बताउनुभयो । उहाँले भन्नुभयो, ‘रामपुरको पर्यटन क्षेत्रको विकासका लागि फनपार्कको आवश्यकता थियो । यहाँको पर्यटन विकासमा महत्त्वपूर्ण भूमिका निर्वाह गर्छ । महिना दिन अघिमात्रै सुरु गरिएको पार्कमा दिनहुँ भिड लागिरहेको छ ।’

राम्रै धान उत्पादन हुने खेतलाई पार्क बनाइएको छ । यो पार्क अहिले बालबालिका मात्रै नभइ सबै उमेर समूहको आकर्षण बनेको छ । बालबालिकालाई बिदाको समय मनोरञ्जनका खेल सामग्री खेलाउन बुटवल, पोखरालगायतका सहरमा लैजानुपर्ने बाध्यता टरेको छ । यहाँभित्र बालबालिकाका लागि विभिन्न मनोरञ्जनका खेल सामग्री, फोटो खिचाउनका लागि विभिन्न दृश्य छन् । यसले गर्दा पनि बालबालिका मात्रै नभइ युवायुवती पनि फोटो खिचाउन र अवलोकनका निम्ति यहाँ पुग्ने गरेका छन् । रामपुरमै पहिलो पटक सुरु भएकाले पनि यसले सबैको मन तानिरहेको छ ।

अन्तिम अपडेट: मंसिर ९, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्