काठमाण्डाै – डोल्पाको याकखर्कबाट चार जना जर्मन नागरिकसहित छ जना पर्यटकको उद्धार गरिएको छ । गएको असोज १७ गते डोल्पाको दुनैबाट पदमार्ग हुँदै मुस्ताङको मुक्तिनाथ निस्कन हिँडेका चार जर्मन नागरिक र दुई जना नेपाली गाइड गरी छ जनाको उद्धार गरिएको हो ।

डोल्पाको याकखर्क पुगेर अलपत्र परेको जानकारी पाएपछि मुस्ताङ प्रहरीले उद्धार गरेको हो । सोलुखुम्बुका जाङ्बु शेर्पा र दावा शेर्पासहित कार्तिक ४ देखि सम्पर्कमा नरहेका पर्यटकहरु आज बिहान याकखर्कमा रहेको भन्ने जानकारीका आधारमा हेलिकोप्टरबाट उद्धार गरी जोमसोम ल्याइएको जिल्ला प्रहरी कार्यालय मुस्ताङका प्रहरी निरीक्षक प्रताप पौडेलले बताउनुभयो ।

हिउँले औंलामा केही समस्या भए पनि उनीहरु सकुशल रहेको जोमसोम अस्पतालले जानकारी दिएको छ ।