काठमाण्डाै - नेकपा (एमाले) का अध्यक्ष एवं पूर्वप्रधानमन्त्री केपी शर्मा ओली चितवन प्रस्थान गर्नुभएको छ । चितवनमा हुने विभिन्न कार्यक्रममा सहभागी हुन अध्यक्ष ओली बिहान ९ बजे चितवन प्रस्थान गर्नुभएको हो  । उहाँ स्थलमार्गबाट नै  चितवन जानुभएको हो ।

उहाँले नारायणगढ–मुग्लिन सडक खण्ड अन्तर्गत दासढुङ्गाको मदनआश्रित पार्कमा रहेको मदन भण्डारी र जीवराज आश्रितको शालिकमा माल्यार्पण गर्ने कार्यक्रम रहेको छ । त्यस्तै, नेकपा एमालेको १० औँ राष्ट्रिय महाधिवेशन उद्घाटनस्थल नारायणगढको नारायणी नदी किनार अवलोकन गर्ने कार्यक्रम रहेको नेकपा एमाले चितवनकी अध्यक्ष पार्वती रावलले जानकारी दिनुभयो । त्यसलगत्तै नेकपा एमाले भरतपुर महानगर कमिटीको अधिवेशन अध्यक्ष ओलीले गर्ने बताइएको छ ।

त्यस्तै, आज दिउँसो साढे तीन बजे भरतपुर–१० मदननगरमा रहेको  नेकपा एमालेको जिल्ला पार्टी कार्यालयमा १० औँ राष्ट्रिय महाधिवेशनको सम्पर्क कार्यालय उद्घाटन गरेर सौराहा जाने कार्यक्रम तय गरिएको छ । एमालेको १० औँ राष्ट्रिय महाधिवेशनको बन्दसत्र हुने ठाउँ सौराहामा आज  बेलुका अवलोकन गर्ने कार्यक्रम रहेको रावलले बताउनुभयो ।

त्यसैगरी, कात्तिक १६ गते बिहान भरतपुर–१६ मा निर्माणाधीन क्रुजशिप (मिनी पानीजहाज)को अवलोकन गर्ने, त्यसलगत्तै माडीको अयोध्यापुरीमा रहेको राम मन्दिरको अवलोकन गर्ने कार्यक्रम रहेको रावलले बताउनुभयो । राम मन्दिरको अवलोकनपछि माडीका स्थानीयवासीसँग एमाले अध्यक्ष ओलीले छलफल गर्ने समेत रावलको भनाइ छ।