काठमाण्डाै - सडक निर्माणमा ढिलाइ गर्दा सास्ती खेप्नु परेको भन्दै स्थानीय बासिन्दाले ललितपुरको हरिसिद्धि–बाडेगाउँ–गोदावरी सडक खण्ड ठप्प पारेका छन्  ।  

पछिल्लो समय भत्केर यो सडक खण्ड हिँडिनसक्नु छ । यस सडकअन्तर्गत हरिसिद्धि, ठैब र बाडेगाउँ कालोपत्रेका लागि काम गर्दा गर्दै ठेकेदारले छोडेपछि हिलाम्य बनेको हो ।

एकातिर सडकका खाल्डाका कारण गाडी चलाउन कठिन भएको छ भने पैदलयात्रुलाई पनि हिँड्न गाह्रो भएको छ । निर्माण सुरु भएको पाँच वर्ष नाघिसक्दा पनि निर्माणाधीन गोदावरी सडकको सुरुको खण्ड कालोपत्रे हुन बाँकी छ।

यो सडक निर्माणको ठेक्का सम्झौता २०७३ साल असारमा भएको थियो । तर, ठेकेदारको लापरबाहीका कारण अझै पनि सडकको मर्मत हुन  सकेको छैन । स्थानीय बासिन्दाको विरोधका कारण सडक खण्ड बन्द भएकाले गोदावरी जाने आउनेलाई वैकल्पिक मार्ग प्रयोग गर्न ट्राफिक प्रहरीको अनुरोध छ ।

तस्बिर साभार : दीपक अर्यालकाे फेसबुक