काठमाण्डाै – राष्ट्रिय प्रजातन्त्र पार्टी (राप्रपा) का निवर्तमान अध्यक्ष डा. प्रकाशचन्द्र लोहनीले ‘म ठूलो हुँ’ भन्ने भाव नराख्न पार्टीका नवनिर्वाचित नेतृत्वलाई आग्रह गर्नुभएको छ । 

आज आइतवार राजेन्द्र लिङ्देन नेतृत्वको नवनिर्वाचित केन्द्रीय सदस्यहरूको शपथ ग्रहण तथा प्रमाणपत्र वितरण समारोहमा बोल्दै निवर्तमान अध्यक्ष लोहनीले नेता हुनेबित्तिकै म ठूलो भएँ भन्ने भावना पाल्न नहुने बताउनुभएको हो । उहाँले पार्टीको विधि, पद्धति, दृष्टिकोण र दर्शनमा बाँधिएर पार्टीलाई देश हाँक्न सक्ने बनाउन सबैले हातेमालो गरेर अघि बढ्नुपर्ने सुझाव दिनुभयाे ।  

निवर्तमान अध्यक्ष लोहनीले एक वर्षभित्र आवधिक चुनाव हुने र त्यसमा आफ्नो पार्टीले सकेसम्म सरकार बनाउने, नभए पनि सशक्त प्रतिपक्षको रूपमा उपस्थिति जनाउने गरी देशव्यापी रूपमा जागरण अभियान सञ्चालन गर्न नयाँ नेतृत्वलाई सुझाव दिनुभयो । उहाँले नयाँ नेतृत्वले पार्टीका अग्रजहरूको सम्मान गर्दै अघि बढ्ने विश्वाससमेत व्यक्त गर्नुभयो । 

निवर्तमान अध्यक्ष लोहनीले राप्रपालाई देशको भरपर्दो प्रजातान्त्रिक शक्तिको रूपमा स्थापित गराउँदै अघि बढ्नुपर्ने आवश्यकतामा पनि जोड दिनुभयो ।