काठमाण्डाै – गृहमन्त्री बालकृष्ण खाणले नेपाली परम्परागत तथा माैलिक गहनाहरूलाई अन्तर्राष्ट्रिय बजारसम्म पुर्‍याउनुपर्ने बताउनुभएको छ । 

आज बुधवार गृह मन्त्रालयमा नेपाल सुनचाँदी रत्न तथा आभुषण महासङ्घ तथा सुनचाँदी व्यापारी प्रतिनिधिसँग छलफल गर्दै गृहमन्त्री खाणले नेपालको परम्परागत तथा मौलिक गहनाहरूलाई अन्तर्राष्ट्रिय बजारसम्म पुर्‍याउनुपर्ने बताउनुभएको हो । नेपालले कच्चा सुन उत्पादन गर्न नसक्दा सुन आयात गर्नु परेको भए पनि आयात गरिएको सुनबाट नेपालको मौलिक गहना निर्माण गरी अन्तर्राष्ट्रिय बजारमा लैजानुपर्ने उहाँले बताउनुभयो ।

नेपाली पुर्खाहरूले लगाएको गहनाहरूको उपयोगिता तथा ऐतिहासिकताको अध्ययन गर्दै त्यसअनुसारकाे गहना बनाइ विदेशी देशमा पठाउनतर्फ ध्यान दिन मन्त्री खाणले व्यवसायीहरूलाई आग्रह गर्नुभयो । गहना निर्यातले नेपालको अन्तर्राष्ट्रिय महत्त्व बढ्न सक्ने उहाँले धारणा राख्नुभयो । 

गृहमन्त्री खाणले नेपालमै गहना निर्माण गर्नाले रोजगारी बढ्ने बताउनुभयो । यसका साथै कच्चा सुन किन्दा विदेशी भूमिमा पुगेको पैसा गहना बिक्री गरेसँगै नेपाल फर्किने पनि उहाँले बताउनुभयो । उहाँले भन्नुभयो, ‘नेपाली कालिगढहरूलाई सिकायो भने नेपालभित्र रोजगारी पनि बढ्यो । नेपाली गहनाले अन्तर्राष्ट्रिय बजार पायो भने पनि त्यसले मद्दत पुर्‍याउँछ । विदेशमा गहना निर्यात गर्न सक्यौँ भने विदेशी पैसा नेपालमा फर्केर पनि आउँछ । त्यतापट्टि ध्यान दिनुस् । विधि अनुकूल तपाईँहरू अगाडि बढ्नुस् ।’

मन्त्री खाणले उद्योगी, व्यवसायीहरूको सुरक्षा गर्ने दायित्व सरकारको भएको उल्लेख गर्दै गृह मन्त्रालय मातहतका निकायहरूले उद्योगी, व्यवसायीहरूको सुरक्षामा काम गर्ने बताउनुभयो ।