नेपालीकै हत्या गरेका एक नेपालीलाई युएईमा पाँच वर्ष जेल सजाय, ब्लडमनी ६३ लाख तिर्नुपर्ने

 भदौ २६, २०७५ मंगलबार १७:५७:२५ | उमाकान्त पाण्डे

युएई – नेपालीकै हत्या गरेका झापाका बिष्णुप्रसाद उप्रेतीलाई यहाँको उच्च अदालतले ५ वर्ष जेल सजायसहित दुई लाख दिर्हाम अथवा झण्डै ६३ लाख रुपैयाँ ब्लडमनी तिर्नुपर्ने फैसला गरेको छ ।  

नवलपरासीका रामबहादुर लामाको हत्या अभियोगमा उप्रेतीलाई यो सजाय हुने भएको हो । अदालतले बिष्णुप्रसादका परिवारले गरेको अपिल अस्वीकार गर्दै मे २०१६ मा तल्लो अदालतले गरेको फैसला नै सदर गरेको हो । 

जनवरी पहिलो हप्ता फैसला भएपनि पूर्ण पाठ भने युएईस्थित नेपाली दूतावासमा यही हप्ता मात्रै आएको युएईका लागि नेपाली कार्यवाहक राजदुत सागरप्रसाद फुयाँलले जानकारी दिनुभयो ।

रामबहादुरकी श्रीमती हरीमाया लामाले अदालतले गरेको फैसलाको पूर्ण पाठ माग गरेकाले अदालतसँगको समन्वयमा आइतबार कन्सुलर विभागमा पठाएको दूतावासले जनाएको छ । 

हरीमायाले श्रीमानको हत्या गर्ने बिष्णुप्रसादलाई युएईको कानुन अनुसार कारबाहीका लागि दूतावासमार्फत यहाँको अदालतमा मुद्दा गर्नुभएको थियो। 

मृत्युदण्ड, ब्लडमनी  र आममाफी गरी यहाँको अदालतले हत्या अभियोग लागेका बिष्णुप्रसादलाई कारबाही गर्न तीन वटा विकल्प दिएको थियो । यी विकल्पमध्ये हरीमायाले ब्लडमनी माग्नुभएको थियो ।  

अदालतले नेपाली दूतावासमार्फत विकल्पको बारेमा हरीमायासँग तीन पटकसम्म सोधेको थियो । हरीमायाले ब्लडमनीनै मागेपछि उहाँकै पक्षमा अदालतले फैसला गरेको हो । 

विष्णुप्रसादका परिवारको अनुरोध हरीमायाद्वारा अस्वीकार

बिष्णुप्रसाद जेल परेपछि उहाँका बुवा धर्मानन्दले नवलपरासी पुगेर हरीमायासँग माफी दिन बिन्ती गर्नु भएको थियो । तर हरीमायाले धर्मानन्दको बिन्ती भन्दा पनि छोराछोरीका लागि सोचेर ब्लडमनीको माग राखेको बताउनुभयो । 

‘पैसा नलिउँ भने आमाले पैसा लिएको भए काम लाग्थ्यो भन्लान छोरीहरुले, बुवा मानेलाई आमाले यसै छाडी भन्लान्,’ हरीमायाले भन्नुभयो । उहाँका दुई छोरीहरु १४ र १२ वर्षका छन् । 

उता जेलमा रहेका बिष्णुप्रसादको परिवारको अवस्था पनि उस्तै छ ।  श्रीमतीसगै १४ वर्षे छोरा र ५ वर्षकी छोरी छन् । बुवा धर्मानन्द मुटुको र आमा मिर्गौला रोगी छन् । आम्दानीको स्रोत छैन । कतै जाँनुपर्दा पनि ऋण खोज्नुपर्ने अवस्था रहेको बिष्णुप्रसादका बुवाले बताउनुभयो । 

दुवै परिवारको विचल्ली 

रामबहादुर पहिलोपटक २०५४ सालमा विदेश जानु भएको हो । साउदी र कतारमा काम गरेर फर्किनु भएका रामबहादुरको युएईबाट फर्किएर विदेश नजाने योजना थियो । 

२०६० सालमा रामबहादुरको परिवार देवचुली सरेका थिए । घरको छेउमा १० कट्ठा खेत जोडेर राख्नुभएको थियो । परदेशमा कमाएको पैसाले रामबहादुरलाई विशालटारमा खेत किन्न मन भएपनि हरीमायाले घडेरी किनाैं भनेपछि देवचुलीमा घडेरी किनेका थिए ।

२०६० सालमा एक तले घर बनाए । त्यही एकतले घरमा १० वर्ष बित्यो । छुट्टिमा घर फर्किएर २०७० सालमा युएई आएका रामबहादुरको त्यसपछी राम्रो कमाइ भयो । महिनैपिच्छे ५० हजार देखी एक लाख रुपैयाँसम्म पठाउन थाल्नुभएको थियो । 

रामबहादुरको हत्या गरेको आरोपमा बिष्णुप्रसाद उप्रेती जेल परेपछि श्रीमती उमा उप्रेतीको पनि विचल्ली भएको छ । 

त्यसअघि छुट्टै बस्दै आएकी उमा अहिले सासुससुरासँग बस्न थालनुभएको छ । नवलपरासीका रामबहादुरलाई मारेको आरोपमा बिष्णुप्रसाद जेल परेको खबर आए सँगै उप्रेतीको परिवार शोकमा छ । भएको १५ कट्ठा जग्गामा पनि विरिङ्ग खोला पसेपछि बगर बनेको छ । 

परिवार विदेशको कमाइमा चलिरहेको थियो । पहिले साउदी बसेर फर्किएका बिष्णुप्रसाद २०७० सालमा युएई आएका हुन् । 

कसरी भयो हत्या ?

नवलपरासीका रामबहादुर लामा २०७२ साउन २२ गते राति आबुधाबी मदिनाजायाद ग्यास्को क्याम्पमा मारिएका थिए । त्यस क्याम्प भित्र अहिले पनि १० हजार नेपाली काम गर्छन । रामबहादुर र बिष्णुसँग एउटै कम्पनीमा काम गर्ने साथीहरु अहिले पनि त्यो घटना सम्झेर झसङ्ग हुन्छन् ।

स्याङ्जाका राजु विश्वकर्माका अनुसार काम गर्ने, एउटै भान्सामा खाना खाने साथी हुन रामबहादुर र बिष्णु । कम्पनीले नै खाना दिने भएकाले पकाउनु पर्दैनथ्यो ।

शुक्रबार छुट्टि भएकाले बिहीबार बेलुकी आफ्नै हातले पकाएको खाने भनेर कोठामा खाना पकाउने चलन थियो । हप्तामा एक दिन हुने छुट्टिमा रमाइलो गरौं भनेर सबैले आफ्नै कोठामा खाना पकाउँथे । 

बिष्णु र रामबहादुरले मात्र हैन सबैले त्यसै गर्थे । साथीहरुका अनुसार तर त्यो दिन मासु र भातसँगै कोठामा रक्सी पनि छिराएका रहेछन् विष्णु र रामबहादुरले । कोठामै रक्सी खाएर सामान्य विषयमा झगडा भएछ । पछि झगडाले उग्र रुप लियो । 

त्यसैबेला बिष्णुप्रसादले रामबहादुरलाई चक्कुले हाने । तत्काल मदिनाजायद अस्पताल लगियो । तर रामबहादुर बाँचेनन् । 

यसअघि उज्यालोमा प्रकाशित खबर 

मृत्यु, माफी र ‘ब्लडमनि’ को व्यथा 

अन्तिम अपडेट: मंसिर ५, २०८१

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

उमाकान्त पाण्डे

उज्यालाे सहकर्मी उमाकान्त पाण्डे युएईमा बसेर पत्रकारिता गर्नुहुन्छ। 

1 Comments

  • ambika

    Sept. 11, 2018, 7:44 p.m.

    पाकिस्तानी ,साउदी,फिलिपिन्सकोहरुलाई त चन्दा उठाएर पनि तिर्छौ।। नेपाली चेली हो दिनै पर्छ।।

  •  0 Reply

तपाईको प्रतिक्रिया

समाचार

लोकप्रिय

१

गुल्मीको धुर्काेटमा एउटै परिवारले चार सय मुरी धान फलायो

२

रुस–युक्रेन युद्ध झनै खराब अवस्थामा, रुसले आणविक हतियार प्रयोग गर्ने चिन्ता बढ्यो

३

अर्जेन्टिना विश्वकपका लागि छनोट : चीनलाई हराउँदै जापान छनोट नजिक

४

पुटिनद्वारा नयाँ आणविक सिद्धान्तमा हस्ताक्षर, युक्रेनलाई ल्यान्ड माइन दिन बाइडेन सहमत

विचार

उज्यालो टी भी

वैदेशिक रोजगारीमा जादा सुरक्षित हुने तरिका

मनोपरामर्शले बदलेको जीवन कथा

विदेशबाट श्रीमान् फर्काउने साहस बटुलेका वित्तीय कक्षा सहभागीका कथा

मेरो कथा मेरो भोगाई