बाँके – कानुन, न्याय तथा संसदीय व्यवस्था मन्त्री दिलेन्द्रप्रसाद बडूले नेकपा एमालेले संविधानभन्दा बाहिर गएर सरकार सञ्चालन गर्दा समय अगाडि नै बाहिरिनुपरेको बताउनुभएको छ । 

सामुदायिक रेडियो प्रसारक सङ्घ (अकोराब) को १ ६ औँ वार्षिक साधारण सभा तथा सामुदायिक रेडियोहरूको राष्ट्रिय सम्मेलनलाई आज बुधवार नेपालगञ्जमा उद्घाटन गर्दै मन्त्री बडूले पूर्वप्रधानमन्त्री ओली सरकार चलाउन असफल भएको बताउनुभयो । देशको प्रधानमन्त्री हुँदा जनताको भवना बुझ्न नसकेको, देश र जनताभन्दा बाहिर गएर सरकार चलाउन खोजेकोले एमाले समय अगाडि नै बाहिरिनुपरेको उहाँकाे भनाइ छ । 

मन्त्री बडूले अहिलेको सरकार विशेष परिस्थितिमा विशेष दायित्वका साथ बनेको भन्दै खतरामा परेको संविधानको रक्षा गर्नु सरकारको मूल जिम्मेवारी भएको बताउनुभयो । संविधानको व्यवस्था र मर्म विपरीत जान खोज्ने सबैको अवस्था ओली नेतृत्वको सरकारको जस्तै हुने उहाँकाे भनाइ थियाे । 

कार्यक्रममा बोल्दै मन्त्री बडूले संविधान रक्षा र संवैधानिक सर्वोच्चताका लागि रेडियो प्रसारणको लक्ष्य बन्नुपर्ने बताउनुभयो । रेडियो प्रसारणले सामाजिक रूपान्तरण र राजनीतिक स्थायित्वका पक्षमा निरन्तर पैरवी गरिरहनुपर्ने उहाँकाे भनाइ छ । 

२०६२/६३ को जनआन्दोलनपछि रेडियो अभियानले नयाँ गति लिएको भन्दै मन्त्री बडूले सरकार सामुदायिक रेडियोहरूको विकासका लागि सधैँ सकारात्मक र प्रतिबद्ध रहेको दाबी गर्नुभयाे । सरकारले रेडियोहरूको नवीकरण शुल्क छुट, रोयल्टीमा ५० प्रतिशत छुट, विद्युत् महसुलमा छुट लगायतको सहुलियत दिएर पनि सहयोग गरिरहेको उहाँले बताउनुभयो ।