काठमाण्डाै – संयुक्त अरब इमिरेट्स (यूएई) काे दुबई जेलमा रहेका पत्रकार उमाकान्त पाण्डेको रिहाइको माग गर्दै माइतीघर मण्डलामा प्रदर्शन भएको छ । 

जेलमा रहनुभएका पत्रकार पाण्डेको रिहाइको माग गर्दै युथ कांग्रेस नेपालले आज शुक्रवार माइतीघर मण्डलामा प्रदर्शन गरेको छ । पत्रकार पाण्डेलाई जेल पुर्‍याउनका लागि यूएईमा रहेकाे नेपाली दूतावास नै लागिपरेको उहाँका आफन्तले आरोप लगाएका छन् । युथ कांग्रेसले घटनामा संलग्न सबैलाई तत्काल कानुनी दायरामा ल्याउन माग गरेको छ । पत्रकार पाण्डे निर्दोष रहेको र उहाँलाई विना सर्त रिहाइ गर्न सरकारले ध्यान दिनुपर्ने प्रदर्शनमा सहभागी पत्रकार पाण्डेका आफन्त पिताम्बर भुसालले बताउनुभयो ।

प्रदर्शनमा वाक स्वतन्त्रता हनन : लोकतन्त्रको उपहास, पराइ भूमिमा : आफ्नैबाट नागरिक असुरक्षित, परराष्ट्रको मौनता : राजदूतलाई हौसला लेखिएको प्लेकार्ड पनि प्रदर्शन गरिएको थियो । 

दुबईमा रहेको नेपाली दूतावासलाई लक्षित गरेर सामाजिक सञ्जाल फेसबुकमा लेखेको कारण देखाइ दुबईको अदालतले पत्रकार पाण्डेलाई २० हजार दिराम जरिबाना र सम्पत्ति जफतसहित देश निकाला गर्ने कारबाही सुनाएसँगै उहाँ त्यहाँको जेलमा रहनुभएको छ ।