काठमाण्डाै – नेकपा एकीकृत समाजवादीका सम्मानित नेता झलनाथ खनालले नेपालमा राजनीतिक परिवर्तन भए पनि नागरिकका आधारभूत आवश्यकता अझै पूरा नभएको बताउनुभएको छ ।

एकीकृत समाजवादी पार्टीले काठमाण्डौको भृकुटीमण्डपमा गरेको आमसभालाई सम्बोधन गर्दै नेता खनालले  नेपालमा स्थापना भएको संघीय लोकतान्त्रिक गणतन्त्रले अझै गाँस, बास र कपासको ग्यारेन्टी नगरेको बताउनुभयो । गणतन्त्र स्थापना भएको १५ वर्ष पुगिसक्दा पनि नागरिक गास, बास र कपासकै अभावमा बाच्न बाध्य हुनु राजनीतिक दल र नेताहरुको लागि प्रमुख सोचनीय विषय भएको खनालको भनाई छ ।

सुखी नेपाली, समृद्ध नेपालको चाहना जनताको बहुदलीय जनवादबाट मात्रै पूरा नहुने भएकाले आफूहरुले समाजदावी यात्रा थालेको खनालले बताउनुभयो । देशमा समाजवादी क्रान्तिको आवश्यकता रहेको तर यसमा एमाले अध्यक्ष केपी शर्मा ओली बाधक बनेकाले आफूहरुले नयाँ पार्टी निर्माण गरेको झलनाथ खनालको भनाई छ । खनालले एमाले अध्यक्ष केपी ओलीले अन्य पार्टीलाई ढक भनेकोमा आपत्ति जनाउनु भएको छ ।

ओलीले केही दिन अघि आफ्नो पार्टीलाई क्वीन्टल र अन्य पार्टीलाई ढक भनेको उल्लेख गर्दै नेता खनालले आफ्नो पार्टी दशाैँ टनको बनिरहेको कुरा हेर्न जिल्ला जिल्लामा जान पनि ओलीलाई चुनौती दिनु भयो ।