काठमाण्डाै – पानी परेका ठाउँका किसानलाई केही राहत मिलेको छ । बर्खेबाली तथा लहरे तरकारी लगाएका र लगाउने तयारीमा रहेका किसानलाई राहत मिलेको हो ।

खेतबारीमा चिस्यान भएपछि धेरै किसान मकै तथा तरकारीबाली रोप्ने काममा जुटेका छन् । मध्य पहाडमा अहिले मकै तथा लहरे तरकारीबाली लगाउन सकिने नार्कको राष्ट्रिय वागवानी अनुसन्धान केन्द्रका मुख्य वैज्ञानिक डा. सुरेन्द्रलाल श्रेष्ठले बताउनुभयो । सिँचाईको सुविधा नभएका क्षेत्रमा किसान आकाशे पानीको भर पर्नुपर्ने बाध्यता छ ।

चैतेबाली थन्क्याएपछि पानी नपर्दा जग्गा खनजोत हुन सकेको थिएन । पानी परेपछि अब मकै, कोदो र बर्खे धानको धुले ब्याड राख्न मिल्ने महोत्तरीको बर्दिबास–७ का किसान विन्देश्वर यादवले बताउनुभयो । पछिल्लो पानीले तरकारी खेती गर्न पनि सहज भएको किसानले बताएका छन् । तर पानी पर्नुअघि चलेको हावाहुरीले आँप, लिचीसहित फलफूलका चिचिला झारेको भङ्गाहा–४ का किसान चौठी सर्दारले गुनासो गर्नुभयो ।