रसुवा – रसुवाको नौकुण्ड गाउँपालिका–३ मा रहेको पारच्याङ स्वास्थ्य चौकीको धारामा ६ महिनापछि खानेपानी आएको छ ।

लामो समयदेखि खानेपानीको अभाव झेल्दै आएको स्वास्थ्य चौकीमा अस्थायी रुपमा खानेपानी पु¥याइएको हो । जेठ महिनाभित्र स्थायी रुपमा नै खानेपानीको व्यवस्था गरिने नौकुण्ड गाउँपालिका–३ का वडाध्यक्ष मेम्बरसिंह तामाङले बताउनुभयो ।

खानेपानीको अभावमा स्वास्थ्य चौकीबाट दिनुपर्ने सेवा प्रभावित हुँदै आएको थियो । कार्यालयको धारामा पानी आउन छाडेपछि स्वास्थ्यकर्मीले पानी बोकेर नै बिरामीलाई सेवा दिँदै आएका थिए ।
स्वास्थ्य चौकीमा एक घण्टा पानी आए पर्याप्त हुने भए पनि धारामा पानी नआउँदा स्वास्थ्य चौकीबाट लामो समय हिँडेर पानी ल्याउनुपर्ने बाध्यता रहेको थियो ।
  
‘पानी आउन थालेपछि सेवा प्रवाहमा सहज भएको छ, स्वास्थ्य चौकीकी अनमी देवी गजुरेलले भन्नुभयो, ‘स्वास्थ्य चौकीमा पानी नियमित हुन पर्ने भएकाले स्थायी रुपमा व्यवस्थापनका लागि समन्वय गरिरहेका छौँ ।’ डेलिभरी सामग्रीलाई उमालेर मात्रै प्रयोग गर्नुपर्ने र यी सामग्री पकाउन पनि धेरै पानी आवश्यक पर्ने उहाँले बताउनुभयो ।

पारच्याङको हरेक घरमा र स्वास्थ्य चौकीमा स्थायी रुपमा खानेपानी वितरण गर्नका लागि काम भइरहेको पारच्याङ खानेपानी उपभोक्ता समितिका अध्यक्ष ग्युर्मी लोप्चन तामाङले बताउनुभयो । ‘हामीले खानेपानी योजना निर्माण गरिरहेका छौँ, अध्यक्ष तामाङले भन्नुभयो, जेठ महिनाभित्रै खानेपानी निर्माण सम्पन्न गर्ने लक्ष्य राखेका छौँ ।’

एसीएफ इन्टरनेशनल र मानेकोर सोसाइटी नेपालले यसअघि खानेपानी निर्माण गरेपनि सडक निर्माणको क्रममा खानेपानीमा क्षति पुगेको थियो । गाउँमा खानेपानीको अभाव नभए पनि सडक निर्माण गर्दा खानेपानीमा क्षति पुगेपछि व्यवस्थापनको अभावमा खानेपानीको अभाव हुन पुगेको थियो । 
गाउँमा खानेपानीको व्यवस्थापनका लागि गाउँपालिकाले ६ लाख बजेट विनियोजन गरेको गाउँपालिकाकी उपाध्यक्ष सृजना लामाले बताउनुभयो । ‘गाउँमा पहिलेदेखि नै खानेपानीको समस्या थियो, उपाध्यक्ष लामाले भन्नुभयो, अहिले बिस्तारै समाधानको गरिरहेका छौँ ।’
 
स्वास्थ्य चौकीमा ८ जना कर्मचारी रहेका छन् । पारच्याङमा ८४ घरधुरी बसोबास गर्छन् ।