ललितपुर – रातो मच्छिन्द्रनाथको रथ तान्ने कामका कारण लगनखेल–जावलाखेल सडक प्रभावित भएको छ । अहिले दिउँसाे ४ बजेदेखि सुरु हुने रथ तान्ने तयारीका कारण अहिले लगनखेल–जावालाखेल सडकमा गाडीहरू रोकिएका छन् । 

ट्राफिक प्रहरीले अहिले नै सडक खाली नगराएको बताए पनि सडकमा गाडीहरू गुडेका छैनन् । दिउँसो ४ बजेपछि रथ तान्नका लागि तयारी गरिँदै छ । आज रथ तान्नका लागि हिजो मङ्गलवार लगनखेलको इति क्षेत्रको सडक मर्मत गरेर कालाेपत्र गर्ने काम गरिएको छ ।

रथलाई आज लगनखेलबाट जावलाखेल तानिने एक दिनअघि गरिनुपर्ने परम्पराअनुसार हिजो बेलुका रथमाथि नरिवल खसालेर चामलको भात पकाएर घुमाएर चढाइएको थियो । यदि आज रथलाई जावलाखेलमा पुर्‍याउन सके यही २१ गते शनिवार भोटो देखाइनेछ । भोटो जात्रापछि रातो मच्छिन्द्रनाथलाई खटमा राखेर बुङ्गमती लगिनेछ भने मीननाथलाई पनि खटमा राखेर टङ्गल लगिनेछ । 

त्यससँगै यस वर्षको रातो मच्छिन्द्रनाथको रथयात्रा सकिनेछ । रातो मच्छिन्द्रनाथको रथजात्रा गएको वैशाख २१ गते पुल्चोकबाट रथ तानेर सुरु भएको हो ।