महिनामा २ पटकभन्दा बढी पेट्राेलियम पदार्थकाे मूल्य बढाएकाे छैन : मन्त्री बडू

जेठ २०, २०७९ शुक्रबार १६:४३:४४ | उज्यालो सहकर्मी

काठमाण्डाै – उद्योग वाणिज्य तथा आपूर्ति मन्त्री दिलेन्द्रप्रसाद बडूले महिनामा दुई पटकभन्दा बढी पेट्रोलियम पदार्थको मूल्य समायोजन नभएको दाबी गर्नुभएको छ ।

आज शुक्रवार राष्ट्रिय सभामा प्रस्तुत जरुरी सार्वजनिक महत्त्वको प्रस्तावमा उठेका विषयहरूको जवाफ दिँदै मन्त्री बडूले प्रस्तावमा उल्लेखित २०७९ जेठ १ गते र जेठ ९ गते लागू हुने गरी दुई पटक मूल्य बढाएको भन्ने विवरणमा कुनै सत्यता नभएको स्पष्ट पार्नुभएको हो । उहाँले २०७८ चैत महिनामा २ गते र २२ गते गरी मूल्य समायोजन भएको र २०७९ वैशाखमा ३१ गते र जेठ महिनामा ८ गते एक पटक मात्र मूल्य समायोजन गरिएको बताउनुभयो ।

मन्त्री बडूले भन्नुभयो, ‘प्रस्तुत सार्वजनिक महत्त्वको प्रस्तावमा उल्लेखित २०७९ जेठ १ गते र जेठ ९ गते लागू हुने गरी दुई पटक मूल्य बढाएको भन्ने विवरणमा कुनै सत्यता छैन । वैशाख ३१ गते र जेठ ८ गते मात्र मूल्य समायोजन गरिएको छ । स्वीकृत कार्यविधि र प्रावधानविरुद्ध गइ महिनामा दुई पटकभन्दा बढी मूल्यवृद्धि भएको छैन ।’

मन्त्री बडूले पेट्रोलमा अहिले पनि ३१ रुपैयाँ ४१ पैसा प्रतिलिटर घाटा, डिजलमा २८ रुपैयाँ ३३ पैसा प्रतिलिटर घाटा, एलपी ग्यासमा सात सय ५१ रुपैयाँ १४ पैसा प्रतिसिलिन्डर घाटा रहेकाे बताउनुभयाे । मट्टीतेल र हवाई इन्धनमा मासिक ६५ करोड रुपैयाँ नाफा रहेको उहाँकाे भनाइ छ । नाफा र घाटा मिलाउँदा अहिले मासिकरूपमा निगम सात अर्ब ७७ करोड रुपैयाँ घाटामा रहेको उल्लेख गर्नुभयो ।

मन्त्री बडूले नेपाल आयल निगमलाई खारेज वा निजीकरण गर्ने भन्ने कुरामा कुनै सत्यता नभएको पनि दाबी गर्नुभयो । राष्ट्रिय सभाको आजको बैठकमा खाना पकाउने ग्यास, डिजल, पेट्रोल, मट्टीतेल लगायतका अत्यावश्यक वस्तु तथा सेवाको मूल्यवृद्धिले पारेको असर कम गर्न यथाशीघ्र पहल गरियोस् भन्ने विषयको जरुरी सार्वजनिक महत्त्वको प्रस्ताव दर्ता भइ सदनमा पेस भएको थियो ।

अन्तिम अपडेट: माघ १६, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्