काठमाण्डाै – नेकपा (माओवादी केन्द्र) का नेता वर्षमान पुनले पार्टीभित्र मन्त्री फेर्ने आवाज उठिरहेको बताउनुभएको छ । 

आज बुधवार संसद् भवनमा सञ्चारकर्मीलाई प्रतिक्रिया दिँदै नेता पुनले माओवादी पार्टीबाट सरकारमा मन्त्री बनेकाहरूलाई फेर्नुपर्ने आवाज उठिरहेको बताउनुभएको हो । उहाँले नेकपा (एकीकृत समाजवादी) ले मन्त्री फेर्ने निर्णय गरेसँगै माओवादी केन्द्रलाई पनि मन्त्री फेर्न दबाब परेको बताउनुभयो । 

उहाँले मन्त्री फेर्नेबारे पार्टीभित्र कुनै छलफल भने नभएको स्पष्ट पार्नुभयो । उहाँले भन्नुभयो, ‘यसबारेमा हाम्रोमा अहिलेसम्म कुनै छलफल भएको छैन । समाजवादीका साथीहरूले पूरै टिम फेरिसकेपछि हाम्रोमा पनि दबाब छ । कांग्रेसमा पनि दबाब छ । जसपामा पनि दबाब छ । यो दबाबलाई नेताहरूले कति थेग्नुहुन्छ थाहा छैन । मन्त्री फेर्नुपर्छ कि भन्ने आवाज उठिरहेको छ ।’

त्यसैगरी सञ्चारकर्मीलाई प्रतिक्रिया दिँदै माओवादी केन्द्रका नेता गिरिराजमणि पोखरेलले संसदमा मन्त्रालयगत छलफल प्रारम्भ भएको बेलामा मन्त्री फेर्न नमिल्ने बताउनुभयो । उहाँले अहिले मन्त्रिपरिषद् हेरफेर गर्नु संयुक्त सरकारको सोचसँग मेल नखाने पनि उल्लेख गर्नुभयो । 

नेता पाेखरेलले गठबन्धनका शीर्ष नेताहरू बसेर मन्त्री हेरफेर गर्ने निर्णय सच्याइसकेको बताउनुभयो ।