जथाभाबी मूल्य वृद्धि गर्नेलाई ठाउँको ठाउँ कारबाही हुने, ११३७ मा उजुरी गर्न उपभोक्तालाई आग्रह

असार १२, २०७९ आइतबार ९:२५:४५ | उज्यालो सहकर्मी

काठमाण्डाै - पेट्रोलियम पदार्थको भाउ बढेको निहुँमा जथाभाबी मूल्य वृद्धि गर्नेलाई कारबाही हुने भएको छ ।

रुस–युक्रेन युद्धलाई देखाएर जथाभाबी भाउ बढाएका व्यापारीले पछिल्लो समय पेट्रोलियम पदार्थको भाउ बढेको निहुँमा आफूखुशी मूल्य बढाएका छन् । तर, हरेक दिन बजार अनुगमन भइरहे पनि पेट्रोलियम पदार्थको भाउ बढेकाले कारबाही हुन सकेको थिएन । अब भने सरकारले पेट्रोलियम पदार्थको भाउ घटाएकाले बजार अनुगमनमा कडाइ गर्ने वाणिज्य आपूर्ति तथा उपभोक्ता संरक्षण विभागले जनाएको छ ।

विभागका निर्देशक हरि पङ्गेनीले जथाभाबी भइरहेको मूल्यवृद्धिलाई नियन्त्रणमा लिन आजैदेखि अनुगमन टोलीको सङ्ख्या बढाएर बजार अनुगमन हुने जानकारी दिनुभयो । त्यसका लागि जनशक्ति पनि थपिएको छ । अहिले हेरक दिन विभागका तीन–चार टोली बजार अनुगमनमा खटिएका छन् । अब यसमा थप दुई–तीन टोली थपेर अनुगमनलाई बढाउने उहाँले बताउनुभयो । हिजो पेट्रोलमा २० रुपैयाँ र डिजल तथा मट्टीतेलमा प्रतिलिटर २९ रुपैयाँले भाउ घटाउँदै सरकारले बजारमा भइरहेको मूल्यवृद्धिलाई नियन्त्रणमा लिन पनि निर्देशन दिएको थियो ।

निर्देशन अनुसार आजैदेखि कर्मचारी खटाइ अस्वाभाविक मूल्य वृद्धिलाई नियन्त्रणमा लिन अनुगमन गर्ने निर्देशक हरि पङ्गेनीले दाबी गर्नुभयो । उहाँले आफू ठगिएको जस्तो लागे विभागको ११३७ नम्बरमा तुरुन्तै फोन गर्न आग्रह गर्नु भएको छ ।

उजुरी परेपछि तत्काल अनुगमन हुने र दोषी पाइए ‘अन द स्पट’ अर्थात ठाउँको ठाउँ कारबाही गर्ने उहाँले बताउनुभयो । बजारमा कतिपय व्यापारीले पेट्रोलियम पदार्थको भाउ बढेको निहुँमा मूल्य वृद्धि गरिरहेका अनुगमनका क्रममा पनि पाइएको छ । अब यस्ता व्यापारीलाई लक्षित गरी अनुगमन गरी कारबाही गरिने विभागले जनाएको छ । तर, इन्धनको भाउ घटे पनि दैनिक उपभोग्य वस्तुमा भइरहेको मूल्यवृद्धि नियन्त्रणमा आउनेमा आशङ्का छ ।

उपभोक्तालाई राहत मिल्ने गरी बजार अनुगमन नहुनु तथा जथाभाबी मूल्यवृद्धि गर्नेलाई कारबाही नहुनु जस्ता कारणले महँगी नियन्त्रणमा आउनेमा आशङ्का गरिएको हो । केही समययता बजारमा दैनिक उपभोग्य वस्तुसहित सबै सामानको भाउ बढेको बढ्यै छ ।

अन्तिम अपडेट: माघ १४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्