काठमाण्डाै - प्रतिनिधि सभाको बैठक सुरु भएको छ । बैठकको शून्य समयमा अहिले सांसदहरुले आफ्नो धारणा राख्दै छन् ।

आजको बैठकबाट राष्ट्रपति विद्यादेवी भण्डारीले पुनर्विचार गर्न भन्दै सङ्घीय संसदमा फिर्ता पठाएको नागरिकता विधेयक पारित गर्ने सम्भावना छ ।

संसद् बैठक अघि नागरिकता विधेयकमा सहमति खोज्न बसेको कार्यव्यवस्था परामर्श समितिको बैठकमा सहमति जुट्न सकेन ।

सभामुख अग्निप्रसाद सापकोटाले नागरिकता विधेयकलगायतका विषयमा छलफल गर्न बोलाउनु भएको कार्यव्यवस्था समितिको बैठकमा सत्तारुढ दलका प्रतिनिधिले तत्काल पारित गर्नुपर्ने र फेरि राष्ट्रपतिकोमा प्रमाणीकरणका लागि पठाउनुपर्ने धारणा राखेका छन् भने प्रमुख प्रतिपक्षी एमालेले थप छलफल हुनुपर्ने बताएको छ।

कांग्रेसका सचेतक मीनबहादुर विश्वकर्माले राष्ट्रिय जरुरी महत्त्वको विषय मानेर नागरिकता विधेयक आजकै प्रतिनिधि सभा बैठकबाट पारित गर्नुपर्ने बताउनुभयो । एमाले सांसद कृष्णभक्त पोखरेलले अहिलेको अहिल्यै पारित गरिहालौँ भन्नुभन्दा पनि राष्ट्रपतिले नागरिकता विधेयक फिर्ता पठाउनुभएपछि प्रधानमन्त्रीले सर्वदलीय बैठक बोलाएर छलफल गर्नु पर्ने बताउनुभयो ।

यस्तै, एमाले नेता शेरबहादुर तामाङले भने सभामुख सापकोटाले नै नागरिकता विधेयकमाथि छलफल गर्न सर्वदलीय बैठक बोलाउनुपर्ने बताउनु भएको थियो।