काठमाण्डाै – कानुन, न्याय तथा संसदीय मामिलामन्त्री गोविन्दप्रसाद शर्मा कोइरालाले नेत्रविक्रम चन्द विप्लव नेतृत्वकाे नेकपासँग भएको सम्झौता पूरा गर्न सरकार प्रतिबद्ध रहेको बताउनुभएको छ । 

सोमवार गृह मन्त्रालयमा आयोजित पत्रकार सम्मेलनमा बोल्दै मन्त्री कोइरालाले नेकपाको वार्ता टोलीले सरकारसँग विसं २०७७ फागुन २० गते सम्झौता गरेको र त्याेअनुसार अहिलेसम्म पाँच सय २३ वटा मुद्दा फर्स्याेट भइसकेको बताउनुभयो । उहाँले नेकपामाथि ६ सय १० वटा मुद्दा लागेको जानकारी दिँदै अहिले ८७ वटा मुद्दा फर्स्याेटकाे क्रममा रहेको बताउनुभयो । 

मन्त्री कोइरालाले भन्नुभयाे, ‘नेकपासँग सम्बन्धित मुद्दा ६० वटा जिल्लामा छ । त्यसमा धेरै हदसम्म काम भएकाे छ । अदालतमा चलेका मुद्दामा पनि एक सय १९ वटा फैसला भइसकेकाे छ । नेकपासँगकाे सम्झाैता पूरा गर्ने कुरामा सरकार प्रतिबद्ध छ ।’

पत्रकार सम्मेलनमा बाेल्दै महान्यायाधिवक्ता खम्मबहादुर खातीले ऐन, कानुनले नकारात्मक सूचीमा राखेका मुद्दाहरू भने मन्त्रिपरिषदबाट फिर्ता लिन नमिल्ने बताउनुभयो । उहाँले फिर्ता लिने मुद्दाहरूमा ३८ थान मुद्दा गृह मन्त्रालयबाट आएको र महान्यायाधिवक्ताको कार्यालयले त्यसको प्रक्रिया पूरा गरेर गृह हुँदै कानुन, न्याय तथा संसदीय मामिला मन्त्रालयमा पुगेको अवस्थामा रहेको बताउनु भयो । ती मुद्दामा क्षतिपूर्तिको माग दाबी भएको कारणले पनि प्रक्रियागत रूपमा अघि बढेको उहाँले जानकारी दिनुभयाे ।