सामाजिक सुरक्षाको भत्ता समेत बचत गर्छन् ८५ वर्षीय वृद्ध !

असोज १४, २०७५ आइतबार १३:४४:५२ | पुरुषोत्तम गिरी

सल्यान – जीवनमा बचत गर्ने बानीको विकास हुन नसकेकोमा पछुतो लागेको बताउने कालिमाटी गाउँपालिका–२, झिगानेका ८५ वर्षका गुरुदत्त सापकोटाले सामाजिक सुरक्षाको भत्ताबाट मासिक पाँच सय रुपैयाँ बचत गर्न थालेको दुई वर्ष भयो ।

दुई वर्षको अवधिमा उहाँले स्थानीय सहकारीमा १२ हजार रुपैयाँ बचत गरिसक्नुभएको छ । ‘जीवनमा कति कमाइयो होला तर बचत गर्ने बानी नहुँदा जीवनको उत्तर्राधमा निकै सकस खेपेको बताउने सापकोटाले वित्तीय साक्षरता कक्षा पाएपछि यस्तो बानीको विकास गर्नुभएको हो ।

‘सहकारीमा गएर ३ हजार ५ सय रुपैयाँ जम्मा गरेँ’, दुई वर्ष अघिको कुरा सम्झँदै सापकोटाले भन्नुभयोे, ‘उमेरमा कमाएको पैसा बचाउन सकिएन, रगत हुँदा यस्तै चल्छ भन्ने लाग्थ्यो । वित्तीय साक्षरता कक्षा पढेपछि थाहा भयो, बचत गर्नु अनिवार्य रहेछ, मेरो पनि आम्दानीको स्रोत त छैन तर सामाजिक सुरक्षा भत्तावापत १ हजार पाउँछु । त्यसैबाट आधा रकम बचत गर्न सुरु गरेको छु ।’

यसरी बचतको बानीको विकास गरेका सापकोट मात्रै एक्ला हैनन् । जिल्लाको एक नगरपालिका र दुई गाउँपालिकाका विकट ९ वटा वडाहरुमा गएको दुई वर्षको अवधिमा झण्डै एक हजार पाँच सय जनाले वित्तीय साक्षरता कक्षा लिएपछि बचत गर्न थालेको हुन् ।

यस्तै वनगाड कुपिण्डे नगरपालिका १२ भदालेकी ५३ वर्षकी मनकली रोकायाले पनि पैसा हुँदा पनि बचत गर्न नसकेको सम्झेर दुख लाग्ने बताउनुभयो । जति दुख गरे पनि आफ्नो परिवारको आर्थिक अवस्था कहिलै सुधार नभएको देखेर निराश भएकी मनकलीले कमाएको थोरै पैसा बचत गरेको भए अहिले दुःख हुने थिएन भन्दै पीडा पोख्नुभयो ।

‘पैसा कमाएर बचाउनुपर्छ भनेर कसैले सिकाएनन्, हामी यस्तो विकटमा बस्ने मान्छेले यस्ता कुरा कसरी आफै थाहा पाउनु ?, उमेर ढल्किसक्यो, अहिले सम्झेर रुँन मन लाग्छ’, मनकालीले भन्नुभयो, ‘तर पनि जति हुन्छ बचत गर्छु, बाचुञ्जेल मेरो हुन्छ, मरेपछि छोरानातीका लागि हुन्छ ।’ दलित विकास समाज सल्यानको पहल बचत गर्ने बानी विकासको कार्यक्रम आयोजना गरिएको हो ।

वित्तीय साक्षरता कक्षा लिएपछि सहभागीले नजिकका सहकारी संस्थामा बचत गर्न जान्छन् अहिलेसम्म ११ सय बढीले सहकारी संस्थामा सदस्य बनेर बचत सुरु गरेको पहल कार्यक्रमका वित्तयि सेवा अधिकृत रमेशकुमार वलीले जानकारी दिनुभयो । अहिले कार्यक्षेत्रभित्र रहेका ६ वटा सहकारीबाट पनि वित्तीय साक्षरता कक्षा सञ्चालन भइरहेको उहाँले जानकारी दिनुभयो ।

‘पारिवारिक हिसाब किताब नराख्दा पैसा जोगाउन सकिँदैन भन्ने कुराबारे थाहा नै थिएन, तर धेरै पैसा कमाउँदा पनि नगद व्यवस्थापन गर्न सकिएन भने गरिब भइँदो रहेछ भन्ने कुरा राम्रोसँग बुझियो’, दमाचौर साना किसान सहकारी संस्थाका अध्यक्ष देवी चन्दले भन्नुभयो, ‘अहिले हामीले जसोतसो जति सकिन्छ बचत गर्ने गरेका छौं ।’

कालिमाटीमा रहेको सामुदायिक बहुउद्देश्यीय सहकारी संस्थामा १४ वर्षसम्म १ सय ७३ जनाले सदस्यता लिए । त्यसमा पनि सदस्यहरु घट्दै थिए । वित्तीय साक्षरता कक्षा पढेपछि दुई वर्षमा ४ सय सदस्य वृद्धि भएको सहकारी संस्थाका अध्यक्ष कुलप्रसाद भण्डारीले जानकारी दिनुभयो ।

समूहमा वित्तीय साक्षरता कक्षा सञ्चालन भएपछि धेरैका आँखा खुल्न थालेको संस्थाका अध्यक्ष निमबहादुर नेपालीले बताउनुभयो । ‘वित्तीय साक्षरता कक्षामा बचत, नगद व्यवस्थापन, ऋण योजना, पारिवारिक बजेटका बारेमा बुझेका सहभागीहरुले आफ्नो व्यवहार सिकेका कुरा लागू गरेको मैले पाएको छु’, अध्यक्ष नेपालीले भन्नुभयो ।

अन्तिम अपडेट: मंसिर १२, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

पुरुषोत्तम गिरी

पुरुषोत्तम गिरी सल्यानका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्