स्याङ्जा – स्याङ्जामा प्रतिनिधि सभा र प्रदेश सभा सदस्य चुनावमा प्रारम्भिक विवरणअनुसार ५० प्रतिशत मत खसेकाे छ । 

सामान्य विवाद र केहीबेरको अवरोधका बीच चुनाव सम्पन्न भएकाे स्याङ्जाका मुख्य निर्वाचन अधिकृत रोमाकान्त ज्ञवालीले जानकारी दिनुभयाे ।  

जिल्लाकाे चापाकोट नगरपालिका १ को भानु मावि मतदान केन्द्रमा दिउँसो तीन घण्टा मतदान राेकिएकाे थियो । कांग्रेस र एमालेका प्रतिनिधिबीच कुटाकुट हुँदा एक राउन्ड हवाई फायर नै गर्नुपरेको थियो । कुटपिट गर्ने वडा सदस्यसमेत रहेका एमालेका प्रतिनिधि सन्तोष थापालाई कारबाही गर्ने सहमति भएपछि मतदान फेरि सुरु भएकाे थियाे ।  

यस्तै चापाकोट १० मा रहेको बोटेटार मावि मतदान केन्द्रमा विवादका कारण मतदान दुई घण्टा ढिलाे सुरु भएको थियो । स्वतन्त्रको प्रतिनिधिको रूपमा एमालेका नेता नै आएको भन्दै कांग्रेसले विरोध जनाएपछि मतदानमा ढिलाइ भएको हो ।

गल्याङ नगरपालिका ७ को मनहरी खर्क मतदान केन्द्रमा पनि विवादका कारण दिउँसो एक घण्टा मतदान राेकिएकाे थियो । प्रहरीले एक राउन्ड हावई फायर गरी अवस्थालाई नियन्त्रणमा लिएको प्रमुख जिल्ला अधिकारी गंगाबहादुर क्षेत्रीले जानकारी दिनुभयो । 

स्याङ्जामा एक सय ९९ वटा मतदान स्थल र तीन सय २० वटा मतदान केन्द्र रहेको थियो । यस चुनावमा स्याङ्जामा दुई लाख ४४ हजार ८९ जना मतदाता थिए ।