काठमाण्डाै - गुरुङ समुदायले आज तमु ल्होसार मनाएका छन् । पुरानो वर्षलाई बिदाइ गरी नयाँ वर्षलाई स्वागत गर्दै आज विभिन्न सांस्कृतिक कार्यक्रमसहित गुरुङ समुदायले काठमाण्डाैसहित देशभर तमु ल्होसार मनाएका हुन्।

काठमाण्डाैको टुँडिखेल लगायत देशका अन्य ठाउँमा आफ्ना सांस्कृतिक पहिचान झल्किने विभिन्न कार्यक्रमहरु गरेर तमु ल्होसार मनाइएकाे छ । 

काठमाण्डाैमा ल्होसार मनाउन काठमाण्डाै नजिकका विभिन्न जिल्लाहरुबाट गुरुङ समुदायका नागरिकहरुकाे उपस्थिति रहेकाे थियाे ।  ल्होसारको कार्यक्रममा प्रधानमन्त्री पुष्पकमल दाहालको समेत सहभागी हुनुभएकाे थियाे । उहाँले तमु समुदायको गौरवशाली परम्परालाई सरकारले उच्च सम्मान गर्ने बताउनु भएको छ । उहाँले इमान्दारिता, लगन, निष्ठा, वीरता र बलिदानको कीर्तिमानका कारण तमु समूदायको पहिचान नेपालमा मात्रै नभइ विश्वभर फैलिएको बताउनु भयाे । 

तमु समुदायले आर्जन गरेको वीरता र बलिदान नेपाल राष्ट्र र नेपाली नागरिकका लागि गर्वको विषय भएको उल्लेख गर्दै उहाँले त्यसको सम्मान गर्ने कामलाई सरकारले प्राथमिकतामा राख्ने बताउनु भयो ।

 ‘ल्हो’ को अर्थ वर्ष र ‘सार’ को अर्थ फेरिनु भएकाले वर्ष फेरिने दिनलाई ‘तमु ल्होसार’काे रुपमा मनाइन्छ ।  तमु ल्होसारका अवसरमा आज सरकारले सार्वजनिक बिदा पनि दिएको छ ।