कफीको उत्पादन बढाउन कृषक पाठशाला सञ्चालन

पुष २२, २०७९ शुक्रबार २०:२४:१४ | जनार्दन घिमिरे

गुल्मी – कफी खेतीको उद्गमस्थल गुल्मीमा पछिल्लो समय यहाँका किसान व्यावसायिक कफी खेतीमा लागेका छन् । किसानलाई कफी खेतीमा थप आकर्षित गर्न विभिन्न कार्यक्रमहरू सुरु गरिएको छ ।

यसै क्रममा प्रधानमन्त्री कृषि आधुनिकीकरण परियोजनामार्फत गुल्मीमा कफीको उत्पादन र उत्पादकत्व वृद्धि गर्न कृषक पाठशाला सञ्चालन गरिएको छ । पाठशाला शिक्षाबाट किसानले आफूले रोपेको कफीका बोटहरूको निरीक्षण गर्दै रोगको पहिचान गर्न थालेका छन् । उनीहरू कफीको बगैँचामा पुगेर सामूहिकरूपमा कफीमा लागेका रोग र किराहरूको बारेमा छलफल गर्ने गर्दछन् । प्रधानमन्त्री कृषि आधुनिकीकरण परियोजना कार्यान्वयन इकाइ गुल्मीले सञ्चालन गरेको प्राङ्गारिक कफी बगैँचा व्यवस्थापनसम्बन्धी १४ हप्ते कृषक पाठशालामा किसानले यस्तो सिकाइ अभ्यास सुरु गर्न थालेका हुन् ।

कृषक पाठशालामा समूहगतरूपमा व्यावसायिक कफी किसानको सहभागिता हुन्छ । कफी खेतीको बारेमा जानकारी लिन उनीहरूले हप्ताको एक पटक कार्यालयका कर्मचारी तथा कफी अनुसन्धान विज्ञहरूसँग विशेष कक्षामार्फत जानकारी लिने र अनुभव साटासाट गर्ने गर्दछन् । पाठशालामा उनीहरूले विशेषज्ञहरूलाई सोधेर तत्कालै समस्या पहिचान गर्ने गर्दछन् ।

प्रधानमन्त्री कृषि आधुनिकीकरण परियोनाले गुल्मीको मदाने गाउँपालिकाको सिर्सेनी र मालीका गाउँपालिकाको मर्भुङ्मा कृषक पाठशाला सञ्चालन गरेको छ । पाठशालाबाट किसानको दक्षता वृद्धि गर्ने र आफ्नो कफी बगैँचामा देखिएका स–साना समस्याहरूलाई आफैँ पहिचान गर्ने बानीको विकास हुने परियोजना प्रमुख गंगाकुमारी पोख्रेलले बताउनुभयो ।

कृषक पाठशालामा २५ देखि ३० जनासम्म कफी किसान सहभागी हुने गर्दछन् । परियोनाले गुल्मीको सत्यवती र कालीगण्डकी गाउँपालिकाका पनि कृषक पाठशाला सञ्चाल गर्ने तयारी गरेको छ । पाठशालामा कफी विज्ञहरूसँग प्रत्यक्षरूपमा बगैँचाको अनुगमन गर्दै त्यहाँ देखिएका समस्याको बारेमा खुलेर जिज्ञासा राख्न पाउँदा आफूहरू उत्साहित बनेको मालिका तरकारी बारी कृषक समूहका अध्यक्ष ओमबहादुर घर्तीले बताउनुभयो । ‘सामान्य कुरा सोध्न पनि अरूलाई गुहार्नु पथ्र्र्योे, गाउँमै पाठशाला सुरु भएपछि धेरै खुसी छौँ’, घर्तीले भन्नुभयो ।

गुल्मीका १२ वटै पालिमध्ये मुसिकोट, रुरुक्षेत्र, मदाने, सत्यवती, कालीगण्डकी लगायतका पालिका कफीको पकेट क्षेत्र मानिन्छ । यहाँ उत्पादनशील एक सय नौ हेक्टर क्षेत्रफलमा कफी खेती हुँदै आएको छ । गुल्मेली कफी वर्षाैँदेखि जापान, कोरिया र फ्रान्सलगायतका देशमा निर्यात हुँदै आएको छ ।

अन्तिम अपडेट: मंसिर ३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

जनार्दन घिमिरे

गुल्मीका क्रियाशील पत्रकार जनार्दन घिमिरे लामो समयदेखि उज्यालोमा कार्यरत हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्