आयल निगममा खड्काको राजीनामा र खुला प्रतिस्पर्धाबाट नयाँ हाकिमको खोजी (भिडियो)

जेठ २४, २०७५ बिहीबार १४:४०:१५ | उज्यालो सहकर्मी

काठमाडौं – इन्धन भण्डारणको लागि जग्गा खरिदमा अनियमितता गरेको आरोप लागेका आयल निगमका कार्यकारी निर्देशक गोपालबहादुर खड्काले राजीनामा दिनुभएको छ ।

खड्काको राजीनामासँगै उद्योग, वाणिज्य तथा आपूर्ति मन्त्री मातृकाप्रसाद यादवले निगमको कार्यकारी निर्देशकको नियुक्ति खुला प्रतिस्पर्धाबाट गर्ने बताउनु भएको छ ।

खड्काले बिहीबार पत्रकार सम्मेलन गरेर मन्त्रीलाई राजीनामा बुझाउनुभएको हो । पत्रकार सम्मेलनमा खड्काले आफूलाई गएको ९ महिनादेखि भूमिकाविहीन बनाएर बदनाम गर्न खोजिएको आरोप लगाउनुभयो ।

‘मैले निगममा धेरै नीतिगत सुधार गरेको थिएँ, तर त्यसलाई छायाँमा पारेर बदनाम गर्ने काम मात्र गरियो’ खड्काले गुनासो गर्नुभयो । ‘९ महिनामा त सन्तान पनि जन्मन्छ । तर मलाई केही गर्न नदिएर भूमिकाविहीन बनाइयो’ खड्काको भनाई छ ।

खड्काले आफूले प्रधानमन्त्री र उद्योग मन्त्रीलाई सजिलो बनाउन राजीनामा दिएको पनि बताउनुभयो । खड्कालाई इन्धन भण्डारको लागि क्षमता बढाउन आवश्यक जग्गा खरिद प्रक्रियामा अनियमितता गरेको आरोप लागेको थियो ।

तत्कालीन संसदीय समितिले खड्काकै निर्देशनमा महंगोमा जग्गा खरिद गरेर भ्रष्टाचार गरेको निश्कर्ष निकालेपछि सरकारले बर्खास्त गरेको थियो । सरकारले बर्खास्त गरेपछि खड्का सर्वोच्च अदालत जानुभएको थियो । सरकारले बर्खास्त गर्ने निर्णय सर्वोच्चले उल्टाइदिएपछि खड्कालाई आपूर्ति मन्त्रालयमा खटाइएको थियो । तर उहाँलाई कार्यकारी भूमिका दिइएको थिएन ।

निगमको नयाँ हाकिम खुला प्रतिस्पर्धाबाट

पत्रकार सम्मेलनमा राजीनामा पत्र पढेपछि खड्काले मन्त्री मातृका यादवलाई राजीनामा बुझाउनुभएको थियो । खड्काको राजीनामा बुझ्दै मन्त्री यादवले निगमको नयाँ कार्यकारी निर्देशक खुला प्रतिष्पर्धाबाट हुने बताउनुभयो ।

मन्त्री यादवले खड्काले पदबाट राजीनामा दिएर नेपाल आयल निगमको कामलाई अघि बढाउन सहज भएको प्रतिक्रिया पनि दिनु भयो । उहाँले निगममा क्षमतावान नेतृत्व ल्याउन पनि खुला प्रतिस्पर्धा गरेर कार्यकारी नियुक्ति प्रक्रिया अघि बढाउने सोचाईमा आफू रहेको बताउनुभयो । मन्त्री यादवले निगममा राजनीतिक नियुक्त हुनै नसक्ने पनि उल्लेख गर्नु भयो ।

मन्त्री यादवले नेपाल आयल निगमको गिरेको साखलाई माथि उठाउने गरी काम गर्ने प्रतिवद्धता पनि व्यक्त गर्नुभयो ।

हेर्नुहाेस् भिडियाे

अन्तिम अपडेट: चैत ३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्