काठमाण्डाै – अन्तर्राष्ट्रिय मानव अधिकारवादी संस्था 'ह्युमन राइट्स वाच' ले नेपालमा गैरन्यायिक हत्याको घटनामा सरकार गम्भीर नभएको जनाएको छ । 

ह्युमन राइट्स वाचले विश्वभरको मानव अधिकार अवस्था विश्लेषण गरेर सार्वजनिक गरेको प्रतिवेदनमा नेपाल सरकार गैरन्यायिक हत्याको घटनामा गम्भीर नभएको उल्लेख गरेको छ । हिरासतमा कैदीको मृत्यु हुने गरेको विषयलाई सरकारले हल्कारूपमा लिने गरेको र सुरक्षाकर्मीले दिएका यातना र मानव अधिकार उल्लङ्घनका घटना अनुसन्धान गर्न सरकारले चासो नदिएको प्रतिवेदनले देखाएको छ । हातहतियार र फिरौतीको आरोपमा तीन पटक जेल परिसकेका विजयविक्रम शाहलाई बाहिर निकालेर उनको नाममा जेलमा राखिएका नाबालक सुन्दर हरिजन रोल्पा जेलमा मृत फेला परेको घटना पनि 'ह्युमन राइट्स वाच' को प्रतिवेदनमा उल्लेख छ । 

यस्तै वन्यजन्तुको आक्रमण नियन्त्रण गर्न गएको असारमा बर्दियामा भएको आन्दोलनमा प्रहरीको दमनमा १९ वर्षकी नविना थारुको ज्यान गएको विषय पनि प्रतिवेदनमा समावेश छ । बर्दिया घटनाबारे अनुसन्धान गर्न सरकारले समिति गठन गरे पनि प्रतिवेदन कार्यान्वयन नगरेको उल्लेख छ । घटनामा सरकारले अनावश्यकरूपमा अश्रु ग्यास, लाठी चार्ज र गोली प्रहार गरेको प्रतिवेदनमा उल्लेख छ । 

यस्तै आन्दोलन वा विवादका क्रममा सुरक्षाकर्मीद्वारा दुर्व्यवहारका घटना धेरै हुने गरेको, अत्यधिक बल प्रयोग हुने गरेको, मानव अधिकार विपरीतका गतिविधि हुने गरेको लगायतका विषय प्रतिवेदनमा उल्लेख छन् । वर्षाैँकाे ढिलाइपछि सङ्क्रमणकालीन न्यायको विषयलाई अघि बढाए पनि पुनः अलपत्र परेको प्रतिवेदनले जनाएको छ ।