स्याङ्जा – स्याङ्जाको दरौं खोलामा माछा मार्दै गरेका तीन चिनियाँ पक्राउ परेका छन । अर्जुनचौपारी गाउँपालिका ३ काे दरौं खोलामा माछा मार्दै गरेकाे अवस्थामा प्रहरीले गए राति उनीहरूलाई पक्राउ गरेकाे हाे ।

पालिकाले खोलामा करेन्ट लगाई माछा मार्न बन्देज लगाएको अवस्थामा माछा मारिरहेको देखेपछि स्थानीयले प्रहरीलाई खबर गरेका थिए । पक्राउ पर्नेमा ४१ वर्षीय यो जोङ यु, ३६ वर्षीय गाहु र ४० वर्षीय यु स्या हु रहेका प्रहरीले जनाएको छ ।

स्थानीयको खबरपछि अर्जुनचौपारी प्रहरी चौकीका प्रहरी टोलीले उनीहरूकाे साथबाट खोलामा करेन्ट लगाउने मेशिन, जाल, माछा समाउने जाली र बा १२ च २७७ नम्बरको जीप पनि बरामद गरेकाे छ । 

पालिकाले उनीहरूलाई जनही पाँच/पाँच हजार रुपैयाँ जरिबाना गरेको छ। पालिकाले आफूअन्तर्गतका नदीखोलामा जाल हाली, करेन्ट लगाएर माछा मार्न निषेधसहित नगद जरिबाना गर्ने कानुनी व्यवस्था गरेको छ । 

बरामद भएका समानसहित तीन जनालाई प्रशासन कार्यालय ल्याएकाे र घटनाकाे बारेमा अनुसन्धान भइरहेकाे प्रहरी नायब उपरीक्षक रविन्द्र खनालले जानकारी दिनुभयाे ।