काठमाण्डाै – सङ्खुवासभामा हेलिकप्टर दुर्घटना भएको छ । भोटखोला गाउँपालिका–४ हम्बरेडाँडामा सामान बोकेको सिम्रिक एअरको हेलिकप्टर दुर्घटनामा परेको हो ।

अपर अरुण (एक हजार ६१ मेगावाट) को जलविद्युत् आयोजनाको सामान बोकेको हेलिकप्टर आज शुक्रवार दिउँसो १ बजेर १० मिनेटमा दुर्घटना भएको स्थानीय डुक्पा भोटेले जानकारी दिनुभयो । उहाँका अनुसार सिप्रङमा हेलिकप्टर दुर्घटनाग्रस्त अवस्थामा देखिएको छ ।

हेलिकप्टर दुर्घटना भएकोबारे जानकारी प्राप्त भएको र अहिले प्रहरी टोली खटिएको जिल्ला प्रहरी कार्यालय सङ्खुवासभाले जनाएको छ । नेपाल नागरिक उड्डयन प्राधिकरण (क्यान) का प्रवक्ता जगन्नाथ निरौलाले पनि हेलिकप्टर सम्पर्कविहीन भएको उज्यालोलाई जानकारी दिनुभएको छ । घटनाको थप विवरण आउँन बाँकी छ ।

तस्बिर : वाङ भाेटे