अमेरिकी गुप्तचर संस्थाहरुले चीन र रुसले राष्ट्रपति डोनाल्ड ट्रम्पको फोनमा कुराकानी सुन्ने गरेको आरोप लगाएका छन् ।

अमेरिकी समाचारपत्र न्यूयोर्क टाइम्सले अमेरिकी गुप्तचर संस्थाहरुलाई उद्धृत गर्दै अमेरिकी राष्ट्रपतिको टेलिफोन कुराकानी चीन र रुसले सुन्ने गरेको समाचार सार्वजनिक गरेको छ । अमेरिकी अधिकारीहरुको हवाला दिँदै समाचारमा भनिएको छ, ‘चीनका जासूस अक्सर फोनमा हुने गरेको कुराकानी सुन्ने गर्छन् । राष्ट्रपति ट्रम्पको कामबारबाहीलाई राम्रोसँग बुझ्न उनको प्रशासन र नीतिलाई प्रभावित पार्न चीनले यस्तो गर्ने गरेको छ ।’

न्यूयोर्क टाइम्सका अनुसार ट्रम्प आफ्ना साथीहरुसँग कुराकानी गर्न आईफोनको प्रयोग गर्दछन् । पटक–पटक अधिकारीहरुको आग्रहका बाबजुद पनि उनी आईफोन प्रयोग गर्न छाडेका छैनन् । राष्ट्रपतिलाई ल्याण्डलाइनमार्फत कुरा गर्न पटक–पटक आग्रह गरिएको छ । 

पत्रिकाले चीन र रुसले राष्ट्रपतिको मात्रै नभएर विदेशी अधिकारीहरुबीच हुने कुराकानी पनि सुन्ने गरेको बताएको छ ।