ऐतिहासिक पदक विजेता पलेशाको भव्य स्वागत

कात्तिक १२, २०८० आइतबार २०:२८:१३ | उज्यालो सहकर्मी

काठमाण्डाै – चीनको हान्झाउमा भएको चौथो एसियाली पारा खेलकुदमा नेपाललाई ऐतिहासिक पदक दिलाएकी तेक्वान्दोकी पलेशा गोवर्द्धनकाे भव्य स्वागत गरिएकाे छ ।

राष्ट्रिय खेलकुद परिषद् (राखेप) का सदस्य–सचिव टंकलाल घिसिङ, नेपाल पारालिम्पिक कमिटीकी अध्यक्ष राधा घले, नेपाल तेक्वान्दो सङ्घका अध्यक्ष प्रकाशशमशेर राणा, महासचिव दीपराज गुरुङ, खेलाडी, प्रशिक्षक, परिवारजनलगायतले पलेशालाई त्रिभुवन अन्तर्राष्ट्रिय विमानस्थलमा स्वागत गरे । विमानस्थलबाट पलेशासहितको तेक्वान्दो टोलीलाई त्रिपुरेश्वरकाे राखेपमा लगिएको थियो ।

पलेशाले केही दिनका लागि चीनकाे शङ्घाईबाट नेपाल आएकी हुन् । उनी शङ्घाईकाे तोङजी विश्वविद्यालयमा आर्किटेक्चर इन्जिनियरिङको स्नातक तहमा अध्ययनरत छिन् । पलेशा नोभेम्बर ७ तारिखमा शङ्घाई फर्किँदै छिन् ।

पलेशा शङ्घाईबाटै एसियाली पारा खेलकुदमा सहभागी हुन हान्झाउ गएकी थिइन् । कात्तिक ७ गते भएको महिला के–४४ क्याटगोरीको ५७ केजीमुनि क्वाटरफाइनलमा पलेशाले चीनकी लिटिङ याङलाई पराजित गर्दै सेमिफाइनलमा स्थान पक्का गरेकी थिइन् । सेमिफाइनलमा काजाकिस्तानकी कमिल्यासँग पराजित भए पनि रिपेचेजमा 'वाई' पाएपछि पलेशाको कास्य पदक पक्का भएको थियो ।

पलेशाले जितेको पदक पारा एसियाली खेलकुदमै नेपालले जितेको पहिलो पदक हो । नेपालले पहिलो संस्करणदेखि नै एसियाली पारा खेलकुदमा सहभागिता जनाए पनि तेक्वान्दो भने चौथो संस्करणदेखि मात्र समावेश गरिएको हो ।

सदस्य–सचिव घिसिङले पलेशालाई नेपाललाई ऐतिहासिक पदक दिलाएकोमा बधाई दिँदै राष्ट्रले अझ धेरै आशा गरेको बताउनुभयाे ।

ऐतिहासिक पदक विजेता पलेशाले आफ्नो अनुभव सुनाउँदै भनिन्, ‘म पढ्न चीन जाँदा पढाइँ र तालिमलाई सँगै लाने सोचेको थिएँ । तर सोचेभन्दा गाह्रो भयो । यहाँ (नेपाल) हुँदा परिवार, गुरु सबैले सहयोग गर्नु हुन्थ्यो । त्यही भएर सजिलो पनि भएको थियो । त्यहाँ (चीन) सबै आफैँले गर्नुपर्ने थियो । तर मैले हार मानिनँ । जसरी पनि पढाइँसँगै तालिमका लागि पनि समय मिलाएँ । खेलकाे दिन 'नर्भस' पनि थिएँ । तर जसरी भए पनि जित्नपर्छ भन्ने चाहिँ थियाे । किनकि एसियन पारा गेम्समा अहिलेसम्म नेपालले पदक जितेको थिएन । पहिलो पदक जितेकोमा खुशी थिएँ । तर मेरो लक्ष्य चाहिँ स्वर्ण पदक नै थियो । पदक तालिकमा राष्ट्रलाई शून्यको अवस्था हुनबाट जोगाएकोमा एकदमै खुशी छु ।’

अन्तिम अपडेट: कात्तिक २९, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्