काठमाण्डौ – नेपाल हस्तकला महासङ्घले आउँदो आर्थिक वर्षको बजेटले दक्षिण एसियाली क्षेत्रीय सहयोग सङ्गठन (सार्क) हस्तकला विकास केन्द्रको स्थापना र सञ्चालनको बारेमा सम्बोधन गर्न नसकेको जनाएको छ ।

महासङ्घका अध्यक्ष प्रचण्ड शाक्यले निकालेको विज्ञप्तिमा देशको कला, संस्कृति र सम्पदा क्षेत्रको संरक्षण गर्दै लाखौँ युवालाई रोजगार प्रदान गर्दै आएको र वार्षिक १२ अर्ब रुपैयाँभन्दा धेरैको वैदेशिक मुद्रा आर्जन गर्ने हस्तकला क्षेत्रलाई बजेटले सम्बोधन गर्न नसकेको उल्लेख छ । तर बजेटले आन्तरिक उत्पादन बढाई आयात प्रतिस्थापन र निर्यात वृद्धि गर्न तथा उत्पादनलाई रोजगारीसंँग आबद्ध गराउने लक्ष्य लिनु निकै सकारात्मक रहेको महासङ्घले जनाएको छ ।

महासङ्घले निजी क्षेत्रसँगको सहकार्यमा बाग्मती प्रदेशलाई उद्योग हब र लुम्बिनी प्रदेशलाई साना तथा मझौला उद्यमी हब बनाइने र प्रधानमन्त्री नेपाली उत्पादन तथा उपभोग अभिवृद्धि कार्यक्रमद्वारा स्वदेशी उत्पादन तथा उपभोग अभिवृद्धि कार्यक्रममार्फत स्वदेशी उत्पादनलाई प्रोत्साहित गर्ने विषयबाट व्यवसायीहरू आशावादी भएको पनि जनाएको छ ।