काठमाण्डाै – नेपाल राष्ट्र बैंकका गभर्नर महाप्रसाद अधिकारीले सहकारी समस्यामा सुधार नआउँदासम्म बैंकको खराब कर्जा घट्न नसक्ने बताउनुभएको छ ।

काठमाण्डौमा आज भएको एक कार्यक्रममा गभर्नर अधिकारीले सहकारीमा देखिएका समस्या समाधान गर्न ढिला भइसकेको बताउनुभयो । उहाँले ग्रामीण क्षेत्रमा बैंक र सहकारी छुट्टै भने पनि कारोबारसँग अन्तरसम्बन्ध रहेको बताउँदै बैंकहरूलाई पारदर्शी बनाउनका लागि बैंकहरूको खराब कर्जा बाहिर ल्याउन आवश्यक रहेको उल्लेख गर्नुभयाे ।

अर्थतन्त्रमा मन्दी र राष्ट्र बैंकको प्रभावकारी नियमनलगायतको असर बैंकको खराब कर्जामा परेको बताउँदै गभर्नर अधिकारीले पछिल्लो समय अर्थतन्त्र सुस्त हुनुमा सहकारीको ठूलो भूमिका रहेको दाबी गर्नुभयो ।

उहाँले बैंकहरूको जोखिमपूर्ण सम्पत्तिकाे व्यवस्थापन गर्न 'एसेट म्यानेजमेन्ट' ऐन राष्ट्र बैंकले बनाउन लागेको बताउनुभयो ।