काठमाण्डौ– नेपाल र रुसबीचको दुई मैत्रीपूर्ण भलिबल खेलको श्रृङ्खला रुसको महिला टोलीले जितेको छ । नेपाली महिला राष्ट्रिय भलिबल टोली दोस्रो मैत्रीपूर्ण खेलमा पनि पराजित भयो ।

त्रिपुरेश्वरमा रहेको राष्ट्रिय खेलकुद परिषद् (राखेप) कभर्डहलमा हिजो भएको खेलमा नेपाल रुसी टोलीसँग ३–० को सोझो सेटमा पराजित भयो । नेपालले पहिलो सेट १४–२५, दोस्रो सेट २३–२५ र तेस्रो सेट २२–२५ ले गुमायो ।

अस्ति आइतवार भएको पहिलो मैत्रीपूर्ण खेलमा पनि नेपाल ३–० कै सेटमा पराजित भएको थियो । नेपालमा रहेको रुसी दूतावासको विशेष सहयोगमा नेपाल भलिबल सङ्घले मैत्रीपूर्ण खेल आयोजना गरेको हो ।

नेपाली महिला टोली काभा नेसन्स लिगको तयारीमा छ । काभा नेसन्स लिग आउँदो साउन १७ गतेदेखि काठमाण्डौमा हुँदैछ । काभा नेसन्स लिगमा आयोजक नेपालसँगै भारत, इरान, श्रीलङ्का र माल्दिभ्स खेल्दैछन् ।