काठमाण्डाै – २० वर्षमुनिको साफ च्याम्पियनशिप फुटबलमा भारतले भुटानलाई हराएको छ । ललितपुरको सातदोबाटोमा रहेको एन्फा कम्प्लेक्सको मैदानमा आज भएको खेलमा भारतले भुटानलाई १–० गोलले हरायो । भारतका लागि खेलको ३७ औं मिनेटमा मोनिरुल मोलाले गोल गरे ।

यो खेल निकै तनावपूर्ण रहेको थियो । यो खेलमा भारतका दुई जना र भुटानका एक जना खेलाडीलाई रेफ्रीले रेड कार्ड देखाएका थिए । खेलकाे ६५ औं मिनेटपछि भारत ९ र भुटान १० जना खेलाडीमा सीमित भएकाे थियाे । जीतसँगै भारतले समूह ‘बी’ मा ३ अङ्क जोडेको छ ।

प्रतियोगितामा भोलि समूह ‘ए’ का बङ्गलादेश र श्रीलङ्का खेल्दैछन् । हिजोदेखि शुरू भएको प्रतियोगिता यही भदौ १२ गतेसम्म चल्नेछ । प्रतियोगिताको समूह ‘ए’ मा आयोजक नेपालसहित बङ्गलादेश र श्रीलङ्का तथा समूह ‘बी’ मा भारत, माल्दिभ्स र भुटान छन् ।