आज राष्ट्रिय भक्का दिवस : लोकप्रिय बन्दै राजवंशी समुदायको साँस्कृतिक परिकार

पुष २९, २०८१ सोमबार ७:४९:४२ | उज्यालो सहकर्मी

काठमाण्डौ – आज राष्ट्रिय भक्का दिवस । पूर्वी तराईका बसोबास गर्ने कोच राजवंशी समुदायले विशेष कार्यक्रमका साथ मनाउँदैछन् । राजवंशी समुदायकाे संस्कृतिअनुसार पुस मसान्तमा पाहुनालाई भक्का दिने चलन रहेकोले हरेक वर्ष पुस २९ गते भक्का दिनव मनाइन्छ ।

पछिल्लो समय कोच राजवंशी समुदायसँगै अन्य जातजातिमा पनि चामलको पिठोबाट बनेको भक्का लोकप्रिय बन्दै गएको छ । पानीको बाफमा बनाइने भक्काको व्यापार अहिले तराई मधेशसहित अन्य शहरहरुमा पनि विस्तार भइरहेको छ ।

लोकप्रिय बन्दै भक्का

भक्का विशेषगरी मङसिर, पुस र माघ महिनामा खाने चलन छ । नयाँ धानको चामालबाट बनाइने भक्का अहिले राजवंशी समुदाय बाहेकमा पनि धेरैले खोज्ने खाना बनेको छ । भक्का बनाउन चामलको पिठोलाई फेरि दाना बनाएर बाफमा पकाउनुपर्ने राजवंशी समाज विकास समिति बाह्रदशी झापाका सचिव हेमप्रसाद राजवंशी बताउनुहुन्छ ।

तातो भक्का अचार, तरकारी, माछा,मासुलगायतसँग खाइन्छ । चिसो बिहान र बेलुकीपख तात्तातो भक्का खानु आनन्दसँगै स्वास्थ्यका लागि पनि उपयुक्त रहेको छ ।

पूर्वी नेपालको झापा, मोरङ, सुनसरीका कोच राजवंशी समुदायमा भक्का प्रचलित छ । महाभारतकालमा भीष्म पितामहले देहत्याग गर्दा मेरो शरीरमा भएका असङ्ख्य शक्ति यही पृथ्वीको प्रकृतिमा छोडेर जाँदैछु । मलाई चामलबाट बनाएको भक्का चढाइदिनु भनेको र त्यही बेलादेखि भक्का संस्कृति बलियो बनेको राजवंशीहरु बताउँछन् ।

राजवंशी समुदायमा पाहुनाको स्वागत र समुदाय जुटेर रमाइलो गर्न भक्काको प्रयोग हुँदै आएको छ । पहिले पहिले गाउँमा भक्का बनाएर धानसँग साट्ने चलन थियो । अहिले राम्रो व्यापार गर्ने वस्तु बनेको छ ।

तराई मधेश मात्र नभई काठमाण्डौ उपत्यका सहितका शहरहरुमा समेत चिसो मौसममा भक्काको व्यापार प्रशस्त हुने गरेको छ । भक्का एउटा समुदायको संस्कृतिसँग जोडिएको खाना भए पनि यसका पारखीहरु बढेका छन् ।

चामालको पिठोलाई बाफमा पकाएर बनाउने यो खाना स्वस्थ हुनुका साथै जाडो मौसमका लागि उपयुक्त रहेको पाइन्छ ।

अन्तिम अपडेट: पुस २९, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्