गण्डकी प्रदेशमा उच्च घनत्व प्रविधिमा आधारित स्याउखेती विस्तार

माघ २९, २०८१ मंगलबार १२:२३:१० | रासस

कास्की – गण्डकी प्रदेशमा उच्च घनत्व प्रविधिमा आधारित स्याउखेती विस्तार भएको छ । एक हजार चार सय ७७ रोपनी क्षेत्रफलमा उच्च घनत्व प्रविधिमा आधारित स्याउखेती विस्तार भएको हो ।

मुस्ताङ, मनाङ, बाग्लुङ, गोरखालगायत हिमाली र उच्च पहाडी क्षेत्रका किसान उच्च घनत्व प्रविधिमा आधारित स्याउखेतीमा आकर्षित हुन थालेका छन् । मुस्ताङ र मनाङ स्याउखेतीका लागि उपयुक्त क्षेत्र मानिन्छ ।

बाग्लुङको ढोरपाटन, गोरखाको चुमनुब्री, म्याग्दीको गुर्जालगायतका ठाउँमा पनि उच्च घनत्व प्रविधिमा आधारित स्याउखेती गरिएको प्रदेशको कृषि मन्त्रालयका सचिव वासुदेव रेग्मीले जानकारी दिनुभयो । मन्त्रालयले स्याउखेती विस्तार तथा व्यवसायीकरण आयोजना र शीतोष्ण फलफूल विस्तार तथा व्यावसायीकरण आयोजनामार्फत किसानलाई सहयोग गर्दै आएको उहाँले बताउनुभयो ।

मुस्ताङ र मनाङलाई मुख्य रूपमा केन्द्रित गरी स्याउखेती विस्तारको आयोजना सञ्चालन गरिएको छ । अन्य जिल्लाका उच्च पहाडी क्षेत्रका किसानले पनि पछिल्लो समय व्यावसायिक स्याउ खेती शुरू गरेका छन् ।

कृषि ज्ञान केन्द्र मुस्ताङका कृषि अधिकृत दिलीप नेपालीका अनुसार लोमान्थाङ गाउँपालिकाबाहेक मुस्ताङका चार वटै गाउँपालिकामा उच्च घनत्वमा आधारित स्याउखेती विस्तार गरिएको छ ।रैथानेभन्दा उच्च घनत्वको स्याउका बोट होचो र हाँगाबिगा कम हुने हुँदा बगैँचा व्यवस्थापन गर्न सहज हुने कृषि अधिकृत नेपालीले बताउनुभयो ।

छिटो र धेरै उत्पादन दिने भएपछि यो प्रविधिको स्याउखेतीतर्फ किसान आकर्षित भएका हुन् । उच्च घनत्वको स्याउखेतीका लागि एउटै बिरुवाको एक हजारदेखि एक हजार दुई सय रुपैयाँसम्म पर्छ ।

बगैँचा व्यवस्थापन पनि खर्चिलो भएकाले सरकारले थप अनुदान सहुलियत दिनुपर्ने किसानको माग छ । उच्च घनत्व प्रविधिको स्याउखेती एक दशकअघि मात्र नेपाल भित्रिएको थियो ।

गण्डकी प्रदेशमा शुरूमा मनाङबाट उच्च घनत्व प्रविधिमा आधारित स्याउखेती शुरू गरिएको थियो । यो स्याउका बिरुवा इटालीदेखि नेपाल भित्र्याइएको थियो ।

थोरै जग्गामा पनि धेरै बिरुवा लगाउन सकिने तथा छिटो र धैरै फल दिने हुँदा यो स्याउखेती फस्टाउँदै गएको हो ।

गाला, फुजी, गोल्डेनलगायत जातका स्याउखेती हुँदै आएको छ । एउटा स्याउको बोटले २५ वर्षसम्म उत्पादन दिने कृषि अधिकृत नेपालीले बताउनुभयो ।

अन्तिम अपडेट: माघ २९, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्