प्रदेश र स्थानीय सरकारले संविधान प्रतिकूल हुनेगरी कानुन बनाए बदर गरिनेछ : कानुनमन्त्री

law minister dhakal

 जेठ ९, २०७६ बिहिबार १४:३७:५८ | उज्यालो सहकर्मी
unn.prixa.net

काठमाण्डाै  – कानुन, न्याय तथा संसदीय मामिलामन्त्री भानुभक्त ढकालले प्रदेश र स्थानीय सरकारले संविधान र संघीय कानुन प्रतिकूल हुनेगरी कानुन बनाए बदर गर्ने चेतावनी दिनु भएको छ ।

मन्त्री ढकालले संविधान र कानुन विपरित चल्न नदिन प्रदेश र स्थानीय सरकारले सबै कानुनको कपी संघीय सरकारलाई अनिवार्य उपलब्ध गराउने व्यवस्था गरिएको पनि स्पष्ट पार्नुभयो ।

बिहीबार संघीय संसदको प्रत्यायोजित व्यवस्थापन तथा सरकारी आश्वासन समितिले काठमाण्डाैमा आयोजना गरेको एक कार्यक्रममा बोल्दै उहाँले संविधान र संघीय कानुन विपरितका कानुन निर्माण गर्न पाउने भ्रममा नपर्न पनि प्रदेश र स्थानीय सरकारलाई सचेत गराउनु भयो । मन्त्री ढकालले सरकारले संविधान बमोजिम नै विधेयक निर्माणको काम गरिरहेको दावी पनि गर्नु भयो ।

मन्त्री ढकालले विधेयक निर्माणका लागि विज्ञहरुको सुझाव लिन पनि सरकार प्रतिवद्ध रहेको बताउनु भयो । उहाँले विधेयक निर्माणको कामलाई छिटो पूर्णता दिन पनि मातहतका सबै निकायलाई सचेत गराउनु भयो ।

अन्तिम अपडेट: जेठ ९, २०७६

तपाईको प्रतिक्रिया