काठमाण्डौ –  युरोपेली राष्ट्र लाटभियामा भएको स्वतन्त्र तिब्बत पक्षधर कार्यक्रममा सहभागी भएका सांसद प्रदीप यादवलाई  समाजवादी पार्टी, नेपालले निलम्बन गरेको छ ।

गएको वैशाख २४ देखि २७ गतेसम्म लाटभियाको राजधानी रिगामा स्वतन्त्र तिब्बत पक्षधर सांसदहरूको भेलामा नेपालबाट यादव र राजपाका सांसद एकबाल मियाँ सहभागी भएका थिए ।

लाटभिया भ्रमणबारे  पार्टीले  स्पष्टीकरण सोधे पनि यादवले जवाफ चित्तबुझ्दो नदिएपछि कारबाही गरेको हो । 

यादवलाई कारबाहीस्वरुप  ६ महिनासम्म पार्टी सदस्यबाट निलम्बन गर्ने निर्णय गरिएको छ ।  सांसद पदबाट निलम्बन गर्ने नगर्ने कुनै निर्णय भने भएको छैन ।

स्वतन्त्र तिब्बतको माग गर्दै आयोजना  गरिएको  कार्यक्रममा नेपाली सांसदको सहभागितापछि  काठमाण्डौस्थित चिनियाँ दूतावासले समेत चासो देखाएको थियो । यादव पर्सा क्षेत्र नम्बर १ बाट प्रतिनिधिसभामा निर्वाचित सांसद हुनुहुन्छ ।