रसुवा – बाढीका कारण शनिबारदेखि अवरुद्ध रहेकोे मैलुङ–स्याफ्रु सडक खण्डमा सोमबारदेखि यातायातका साधन सञ्चालन सुरु भएको छ ।

बाढीले क्षति पुर्‍याएको सडकको मर्मत सकिएसँगै सोमबार मध्यान्ह १२ बजेदेखि यातायातको साधन सञ्चालन हुन थालेको प्रमुख जिल्ला अधिकारी अर्जुन भण्डारीले बताउनुभयो । अविरल वर्षाका कारण आएको बाढीले ठूलो खोलाको हिमपाइप बगाएपछि सडक अवरुद्ध भएको थियो ।

त्रिदेशीय व्यापारमा सहज बनाउनका लागि निर्माण गरिएको सडक हस्तान्तरण भएपछि स्तरोन्नति हुन सकेको थिएन । सडकको विस्तृत परियोजना प्रतिवेदन (डीपीआर) असारमा सकाएर काम सुरु गर्ने योजनाका साथ प्रक्रिया अघि बढेको थियो ।

वर्षाको समयमा सडकमा पहिरोले थप क्षति गरेपछि निर्माण गरिएको डीपीआर संशोधन गर्न परेको कारण निर्माण कार्य पछि धकेलिएको थियो । यो सडक बेत्रावती, कालिकास्थान धुन्चे हुँदै स्याफ्रु जोड्ने सडकभन्दा २५ किलोमिटर छोटो छ । 

बेत्रावती कालिकास्थान धुन्चे हुँदै स्याफ्रु पुग्न ५४ किलोमिटर रहेको छ । बेत्रावती मैलुङ स्याफ्रुबेसीको दूरी २९ किलोमिटर मात्रै छ ।