काठमाण्डौ – सरकारले समितिबाट कम्पनीमा गएका यातायात व्यवसायीको बैंक खाता खुला गरेको छ । 

यातायात व्यवसायी समितिबाट कम्पनीमा नजाँदा सरकारले २०७५ वैशाख २१ गते यातायात व्यवसायी समितिका नाममा रहेका बैंक खाता रोक्का गर्ने निर्णय गरेको थियो । 

यातायातमा सिन्डिकेट चलाइरहेका व्यवसायीलाई सरकारले कम्पनीमा जान आग्रह गरे पनि अटेर गरेपछि गृह मन्त्रालयले २ सय ५० यातायात समितिका बैंक खाता रोक्का गरेको थियो । 

साउन १६ गते बसेको मन्त्रीपरिषद्को बैठकले समितिको नाममा रहेका बैंक खाता रुपान्तरित कम्पनीमा सार्ने व्यवस्था गरेको सरकारका प्रवक्ता तथा सञ्चार तथा सूचना प्रविधिमन्त्री गोकुलप्रसाद बाँस्कोटाले बताउनुभयो । 

अहिलेसम्म झण्डै २ सय समितिका ४० हजार गाडी कम्पनीमा दर्ता भैसकेको यातायात व्यवस्था विभागले जनाएको छ । समिति छाडेर कम्पनीमा गएका यातायात व्यवसायीले बैंक खाता फुकुवा गर्न माग गर्दै आएका थिए ।