काठमाण्डौ – नेपाल भ्रमण वर्ष–२०२० लाई लक्षित गरेर नेपाल पर्यटन बोर्डले चीनको ट्याक्सी नेटवर्कसँग साझेदारी गरेको छ । 

चिनियाँ पर्यटकलाई नेपाल तान्न चीनको सबैभन्दा ठूलो ट्याक्सी नेटवर्क दिदीसँग सहकार्य गरिएको बोर्डले जनाएको छ । ‘सेलिब्रेट लभ् इन नेपाल’ भन्ने सन्देशसहित हिजोदेखि यो कार्यक्रम सुरु भएको बोर्डले जनाएको छ ।

चीनमा अगष्ट ७ तारिखमा ‘चाइनिज भ्यालेन्टाइन डे’ मनाउने अवसर पारेर कार्यक्रम सुरु गरिएको बोर्डले जानकारी दिएको छ । बोर्डले यो अभियानलाई  डिजिटल र पर्चा पम्लेटका माध्यमबाट प्रचारप्रचार गरिएको जनाएको छ । ट्याक्सी नेटवर्कमार्फत चीनको वि च्याट, वेइबो र वेबसाइटमा पनि नेपाल भ्रमणका सामग्री राखिएको छ । यसरी गरिएको प्रचार सामाजिक सञ्चालमार्फत २० लाख प्रयोगकर्तासम्म पुग्ने र ६ करोड म्यासेज पनि पठाइने बोर्डले जनाएको छ । 

यस्तै संघाइ र झाङसोउ सहरका चर्चित स्थानमा पनि डिजिटल बोर्ड राखेर पर्यटन प्रवर्द्धनका काम गरेको  बोर्डले जनाएको छ ।